ओली नयाँ जुक्ति खोज्दै

३ पुष, काठमाडौं । पार्टीभित्र किनारा पार्न खोजिएको भन्दै प्रधानमन्त्रीसमेत रहेका नेकपा अध्यक्ष केपी ओली यतिबेला विक्षिप्त छन् । कात्तिक २८ काे सचिवालय बैठकमा अर्का अध्यक्ष पुष्पकमल दाहाल प्रचण्डले प्रस्तुत गरेको राजनीतिक प्रतिवेदन आफूप्रति लक्षित भएको र त्यो पूर्णत आरोपपत्र रहेको भन्दै ओलीले खारेज गरेपछि विवाद नयाँ चरणमा प्रवेश गरेको थियो ।

ओलीले प्रचण्डको कथित आरोपपत्रलाई जवाफ दिंदै अर्काे प्रतिवेदन पेश गरे । दुबै प्रतिवेदनमाथि सचिवालयमा छलफल भयो । तर निकास दिन भने सकेन । त्यसैले उक्त प्रस्ताव उपर छलफल गर्न स्थायी कमिटी वैठक बोलाइएको छ । ओली भने प्रचण्डको प्रस्वावमाथि कुनै हालतमा छलफल चलाउन चाहँदैनन् । तर बहुमत सदस्य भने छलफलबाट एउटा निश्कर्ष निकालेर केन्द्रीय कमिटीले छिनोफानो गरोस् भन्ने पक्षमा छन् ।

यही विवादलाई व्यवस्थापन गर्न नसक्दा ओली उट्पट्याङ गर्न उद्यत् छन् । बहुमतको निर्णय नहोस् भन्ने उनको चाहनाले गर्दा उनी विभिन्न फण्डा तयार गर्दैछन् । त्यसैमध्येको एउटा हो, अध्यादेश प्रकरण ।  संवैधानिक परिषदको काम कर्तव्य र अधिकारसम्बन्धी ऐनमा उनले संशोधन गर्न अध्यादेश जारी गराए । जसले गर्दा पार्टीको ध्यान अर्कातिर केन्द्रित भयो । चर्काे दबाब खासगरी संसदकाे विशेष अधिवेशन बोलाउने विषय जब सकार हुन लाग्यो अनि भने ओली थोरै गलेका छन् । तर उनी अझैपनि प्रचण्डको प्रतिबेदनमाथि छलफल गर्न तयार छैनन् । उक्त प्रतिबेदन जसरी भएपनि कार्यसूचीबाट हटाइनुपर्ने ओलीको शर्त यथावत छ ।

यही शर्त पूरा गराउन उनी मौखिक रुपमा अध्यादेश फिर्ता गर्न सहमत भएपनि कार्यान्वयन गर्न भने हच्किरहेका छन् । उल्टो हिजो उनले फिर्ता लिन्छु भन्ने अध्यादेशकै बलमा संवैधानिक परिषदको मिडिङ डाकेका थिए । प्रचण्डले चर्काे विरोध गरेपछि बल्ल ओली बैठक नराख्न सहमत त भए । तर साँझ बसेको मन्त्रिपरिषद बैठकबाट अध्यादेश फिर्ता गर्न भने उनी राजी भएनन् ।

अध्यादेश फिर्ता गर्ने नै हो भने स्थायी कमिटी बैठक रोकेर संयुक्त प्रस्ताव तयार गरेर मात्र अगाडि बढ्न सकिने ओलीको योजना छ । तर बहुमत सदस्य त्यसका लागि तयार छैनन् । जसले गर्दा ओली के गर्ने भन्नेमा अन्योलग्रस्त नै देखिएका छन् । सजिलो गरी काम भएन भने जालझेल गरेरै भएपनि अगाडि बढ्ने मानसिकता चाहिं ओली पक्षले बनाएको देखिन्छ । त्यसैले गर्दा स्थायी कमिटीमा फिर्ता लिन्छु भनेको अध्यादेश अझै लिइएको छैन ।

चुलिंदो आक्रोश

हिजोको भेटमा प्रचण्डले ओलीलाई सुझाएका थिए– आजै क्याबिनेट बैठक डाकेर अध्यादेश फिर्ता लिने प्रकृया थाल्नुहोस् । जवाफमा ओलीले यसबारे थप परामर्श आवश्यक रहेको बताएका थिए । ओलीले भनेका थिए– यो विषय राष्ट्रपतिसँग पनि जोडिएकाले एकपटक सल्लाह गरेर मात्रै फिर्ता लिने प्रकृया अगाडि बढाउँछु । रुपमा ओलीले यस्तो तर्क गरेपनि सारमा भने प्रचण्डको प्रस्ताव फिर्ता लिने नै रहेको छ ।

ओलीले हिजो फिर्ता प्रकृया अगाडि नबढाएपछि आज बिहान खुमलटारमा शीर्ष नेता भेला भएका थिए । अब कसरी प्रस्तुत हुने भन्नेमै नेताहरु छलफलमा जुटे । पुस ५ गतेसम्म पनि ओलीले अध्यादेश फिर्ता नगरे फेरि संसद्को विशेष अधिवेशन माग गर्ने सहमति जुटेको छ ।

ओलीको जालझेल

जति प्रयास गर्दासमेत प्रचण्ड र माधवकुमार नेपाल पक्षलाई गलाउन नसकेका ओलीले अब सभामुख अग्निप्रसाद सापकोटाको मुद्धा व्यूँताउने अभियान थालेका छन् । संबैधानिक परिषद बैठकमा नआएका सभामुख सापकोटाविरुद्ध सर्वाेच्चमा परेको अर्जुन लामा हत्यासम्बन्धी मुद्धाको पेशी चढेको छ ।

आज प्रधानन्यायधीशसमेतको इजलाशमा सापकोटाको मुद्धा चढेको हाे । आजै उक्त मुद्धाको सुनवाई हुँदैछ । यो मुद्धा व्यूँतिएपछि पूर्व माओवादी पक्ष हच्केको छ । ओली पक्षले अब प्रचण्डलाई समेत अन्तर्राष्ट्रिय अदालतमा पुर्याउने भन्दै हेगको त्राश दिइरहेका छन् ।

गुट भेलामै व्यस्त

प्रधानमन्त्री ओलीले बहुमत नेताहरुलाई हाक्काहाक्की चुनौती दिंदै आफूखुसी गर्न थालेपनि त्यसलाई निस्तेज पार्न प्रचण्ड – नेपाल पक्ष सक्षम देखिएन । बरु ओलीविरुद्ध गुट भेलामै चित्त बुझाइरहेको छ । आजपनि यो समूहले पेरिसडाँडामा अर्काे गुट भेला आयोजना गरेको छ ।

प्रदेश १ का पार्टी कमिटी अध्यक्ष तथा सचिवहरुको आज भेला गरिएको छ । भेलामा प्रचण्ड र नेता नेपाल पक्षीय नेता मात्र सहभागी छन् । ओलीले पार्टी भित्र गरेको ज्यादतिको चर्चा गर्दै नेताहरुले भोलिको सम्भावित परिस्थितिबारे समीक्षा गरे ।