उखु किसानको आन्दोलनमा कांग्रेस वरिष्ठ नेता पौडेलको साथ, सरकारलाई चेतावनी

३ पुष, काठमाडौं । आफ्नो आँशु र पसिनाको मूल्य उठाई दिन आन्दोलन गरिरहेका उखु किसानलाई साथ दिन कांग्रेस बरिष्ठ नेता रामचन्द्र पौडेल माइतीघर पुगेका छन् । प्रमुख प्रतिपक्षी दल कांग्रेसका बरिष्ठ नेता रामचन्द्र पौडेल शुक्रबार माइतीघर पुगेका हुन् । आन्दोलनरत किसानहरुलाई आफू र आफ्नो पार्टी आन्दोलनरत उखु किसानको साथमा रहेको समर्थन पौडेलले दिएका छन् ।

शुक्रबारै बसेको कांग्रेसको संसदीय दलको कार्यसमिति बैठकले उखु किसानको आन्दोलनमा ऐक्यबद्धता जनाउने निर्णय गरेको थियो । उखु किसानको आन्दोलनमा शुक्रबार नै दुई मन्त्री पनि पुगेर माग सम्बोधन गर्ने प्रयास गरेका छन् ।

उद्योग मन्त्री लेखराज भट्ट र संघीय मामिला तथा सामान्य प्रशासन मन्त्री हृदयेश त्रिपाठी दुवैले पनि किसानका मर्का आफूहरुले बुझेको भन्दै बक्यौता रकम दिलाउने प्रतिबद्धता जनाएका थिए ।

नेताहरुले नै मिल मालिकलाई जोगाउन दबाब दिने गरेको बताएका मन्त्री भट्टले किसानहरुको बाँकी रकम शनिबारसम्म बैंकमा जम्मा नभएर मिल मालिकहरुलाई पक्राउ गरिने बताएका थिए । तर पनि किसान सडकमा हुँदा मन्त्री रमिते बन्न सडकमा आएको भन्दै उनको विरोधमा नाराबाजी भएको थियो ।