आजै स्थायी कमिटीको बैठक बसेर ओलीलाई पार्टीबाट निकाल्ने खुमलटार भेलाको निर्णय

५ पुष, काठमाडौं । प्रधानमन्त्री केपी ओलीले संसद विघटन गर्न गरेको निर्णय राष्ट्रपतिसमक्ष आफैं गएर पेश गरेका छन् । बिहान करिब ११ बजे ओली शीतलनिवास गएका थिए । सिफारिश बुझाएर ओली अहिले आफ्नो सरकारी निवास बालुवाटार फर्केका छन् ।

अब आइपर्ने राजनीतिक चुनौतीसँग कसरी सामना गर्ने भनेर ओलीले निकट नेताहरुसँग छलफल गर्न थालेका छन् । उता, अर्का अध्यक्ष पुुष्पकमल दाहाल प्रचण्डलगायत वरिष्ठ नेताहरु झलनाथ खनाल, माधवकुमार नेपाल र नारायणकाजी श्रेष्ठ पनि खुमलटारमा भेला भएर रणनीति बनाउँदै छन् ।

उनीहरुले पहिले एकपटक ओलीलाई बिघटनको सिफारिस फिर्ता लिन दवाव दिने नमानेमा आजै स्थायी कमिटीको बैठक धुम्बाराहीमा डाकेर अनुशासनको कारवाही गर्ने निष्कर्ष निकालेका छन् । प्रधानमन्त्री ओलीले पार्टी निर्णय विपरित असंवैधानिक र प्रतिगामी कदम चालेको निष्कर्ष निकाल्दै प्रचण्ड नेपाल समुहले ओलीलाई पार्टी अनुशासन तोडेको भन्दै साधारण सदस्यता समेत नरहने गरि पार्टीबाट निकाल्ने तयारी गरेका छन् ।

राजनीतिक वृत्तमा विकसित पछिल्लो घटनाक्रमले आज १ बजेका लागि तय गरिएको स्थायी कमिटी बैठक प्रभावित भएको छ । ओलीले बैठकमा आफू नआउने भन्दै बालुवाटारमा गर्नसमेत नदिने संकेत गरेका छन् । त्यसैले स्थायी कमिटी बैठक नै अवरुद्ध हुने देखिएको छ ।

अर्कातिर नेकपासम्वद्ध सांसद्हरु भने ओलीको संसद विघटनसम्बन्धी सिफारिशपछि बिखलबन्दमा परेका छन् । नेताहरुसँग सम्पर्क गर्न नसकेकाहरु सिंहदरबारस्थित संसदीय दलको कार्यालयमा भेला भएका छन् । अब के गर्ने हो भनेर उनीहरु नेताहरुको आदेशको पर्खाइमा छन् ।

आज बिहान विघटन गर्न भनी ओलीले बोलाएको मन्त्रिपरिषद बैठकमा सहभागी मन्त्रीहरुले यसबारे गाइँगुई गरेका हुुन् । तर विघटनकै सिफारिश भने नहोला भन्ने उनीहरुले ठानेका थिए । ओलीले अहिलेको अवस्थामा आफू विघटन गर्न वाध्य भएको जिकीर गरेपछि तीन जना मन्त्रीले प्रतिवाद गरेका थिए ।

उर्जा मन्त्री वर्षामान पुन, कृषि मन्त्री घनश्याम भूषाल र पर्यटन मन्त्री योगेश भट्टराईले प्रधानमन्त्रीको सिफारिस गलत भएको भन्दै थिए । तर ओलीले उनीहरुको कुरा सुनेपछि कुनै जवाफ नदिई बैठकबाट बाहिरिएका थिए ।