सिफारिश सदर, वैशाखमा दुई चरणमा निर्वाचन

५ पुष, काठमाडौं । अन्ततः धेरैको जिज्ञाशा मेटाउँदै राष्ट्रपति विद्यादेवी भण्डारीले संसद् विघटनको सिफारिश सदर गरेकीछन् ।  प्रधानमन्त्री केपी ओलीले आजै बिहान मन्त्रिपरिषद बैठक डाकी संसद् विघटन गरी आउने बैशाख १७ र २७ गते दुई चरणमा संसद्को निर्वाचन गर्न मिति सिफारिस गरेका थिए ।

संविधानले स्पष्ट रुपमा संसद् विघठन गर्न प्रधानमन्त्रीलाई सहज बाटो नदिएकाले राष्ट्रपतिबाटै त्यसमा सुधार हुने आम अपेक्षा विपरीत राष्ट्रपतिले विघटनलाई वैधता दिएकीछन् । राष्ट्रपति कार्यालयबाट जारी विज्ञप्तिमा प्रयोग भएको भाषासमेत गोलमटोल भएकाले संविधानको धाराको प्रष्ट उल्लेख भएको छैन ।

राष्ट्रपति कार्यालयले आज विज्ञप्ति जारी गरी यस्तो जानकारी दिएको हो । विज्ञप्तिमा भनिएकोछ– संविधानको धारा ७६ को उपधारा (१) र (७) तथा धारा ८५ एवं संसदीय प्रणालीको आधारभूत मर्म एवं मूल्य मान्यता तथा हाम्रै आफ्नै र संसदीय प्रणाली भएका विभिन्न मुलुकहरुको अभ्यास बमोजिम संघीय संसद्को वर्तमान प्रतिनिधिसभा विघटन गरी ताजा जनादेशका लागि नेपाली जनता समक्ष जान मिति २०७८ बैशाख १७ गते पहिलो चरण र २७ गते दोस्रो चरणमा अर्काे प्रतिनिधिसभा गर्न मन्त्रिपरिषदबाट निर्णय भई प्रधानमन्त्रीले सिफारिश गरेकाले सदर गरिएकोछ । राष्ट्रपतिले ओलीको सिफारिश सदर गरेपछि अबको राजनीतिक माहोल अझै पेचिलो हुने देखिएको छ ।