अख्तियारको प्रमुखमा प्रेम राई, आयुक्तमा चन्द र सिलवाल सिफारिस

५ पुष, काठमाडौं । अख्तियार दुरुपयोग अनुसन्धान आयोगको प्रमुख आयुक्तमा प्रेमकुमार राई सिफारिस भएका छन् । संवैधानिक परिषद्को गत मंसिर ३० गतेको बैठकले राईको नाम सिफारिस गरेको हो ।

परिषद सदस्य समेत रहेका राष्ट्रिय सभाका अध्यक्ष गणेश तिमिल्सिनाका अनुसार अन्य निकायहरुमा पनि नियुक्ति सिफारिसको निर्णय भएको छ ।

राई प्रधानमन्त्री केपी शर्मा ओलीका तर्फबाट सिफारिस भएका हुन् । अख्तियारको आयुक्तमा कांग्रेस सभापति शेरबहादुर देउवाका तर्फबाट पूर्व एआईजी जयबहादुर चन्द र प्रधानन्यायाधीको तर्फबाट उच्च अदालतका मुख्य न्यायाधीश किशोर सिलवाल पनि सिफारिस भएका छन् । चन्दको सिफारिसले प्रधानमन्त्री ओलीको कदममा कांग्रेसको पनि साथ रहेको देखिएको छ ।

सरकारले पुस २९ गते संवैधानिक परिषद सम्बन्धि अध्यादेश जारी गरेको थियो । लगत्तै ३० गतेको बैठकले सिफारिसको निर्णय लिएको हो । तर प्रधानमन्त्रीको यो निर्णयको चौतर्फी आलोचना भइरहेको छ । प्रधानमन्त्री केपी ओलीले आजको क्याबिनेट बैठकमा यसअघि जारी भएको संवैधानिक परिषदसम्बन्धी अध्यादेश फिर्ता लिने जानकारी मन्त्रीहरुलाई दिए ।

तर आजै बिहान त्यही अध्यादेश जारी भएकै दिन मंसिर ३० गते बसेको परिषद बैठकले पूर्व सचिव प्रेम राईलाई अख्तियार दुरुपयोग अनुसन्धान आयोगको प्रमुख आयुक्तमा सिफारिश गरेको पत्र पुुग्यो ।

यसबाट ओलीको अभिष्ट पूरा भयो । किनभने राईको नाम अनुमोदन गर्ने निकाय संसद् नै विघटन भएको छ ।