ओलीको निरकुंशताको प्रतिवाद गर्ने नेकपा, कांग्रेस र जसपाको निर्णय

५ पुस, काठमाडौं । प्रधानमन्त्री केपी शर्मा ओलीविरुद्ध सत्तारुढ नेकपासहितका मुख्य तीन दलले सशक्त आन्दोलन गर्ने भएका छन् । सत्तारुढ नेकपा, नेपाली कांग्रेस र जनता समाजवादी पार्टी जसपाले संसद विघटनको संयुक्त रुपमा प्रतिवाद गर्ने निर्णय गरेका हुन् ।

कांग्रेस संसदीय दलको कार्यालय, सिंहदरबारमा बसेको बैठकमा नेकपाका वरिष्ठ नेता माधवकुमार नेपाल, झलनाथ खनाल, नारायणकाजी श्रेष्ठ ‘प्रकाश’ र देव गुरुङ थिए भने कांग्रेसका वरिष्ठ नेता रामचन्द्र पौडेल, प्रमुख सचेतक बालकृष्ण खाँड र मिनेन्द्र रिजाल तथा जसपाका डा। बाबुराम भट्टराई र राजेन्द्र महतो थिए ।

बैठकले संसद विघटन गर्न प्रधानमन्त्रीले गरेको सिफारिस र त्यसलाई अनुमोदन गर्ने राष्ट्रपतिको कदम दुबै असंवैधानिक र अलोकतान्त्रिक भएको निष्कर्ष निकालेको छ । तीन दल एक ठाउँमा आउँदा प्रधानमन्त्री ओलीलाई भने सकस पर्ने देखिन्छ ।