ओलीविरुद्ध कांग्रेसले बोलायो सर्वदलीय बैठक

६ पुस, काठमाडौं । नेपाली कांग्रेसले सर्वदलीय बैठक बोलाएको छ । प्रधानमन्त्री केपी शर्मा ओलीले संसद भंग गरेपछिको राजनीतिक अवस्थाबारे छलफल गर्न नेपाली कांग्रेसले सर्वदलीय बैठक बोलाएको हो ।

दिउँसो चार बजे पार्टी कार्यालय सानेपामा बोलाइएको बैठकमा समसामयिक राजनीतिक घटनाक्रम र अबको बाटो कस्तो हुने ? भन्ने विषयमा छलफल हुनेछ । बैठकमा ओलीको कदमलाई कसरी सामना गर्ने भन्ने विषयमा छलफल हुने बताइएको छ ।

संसद भंग गर्ने र आगामी वैशाखमा मध्यावधि निर्वाचन गर्ने ओलीको कदमको अहिले सर्वत्र विरोध भइरहेको छ । कांग्रेसका नेताहरुले पनि ओलीको कदमको विरोध गर्दै अब सशक्त प्रतिरोध गर्नुपर्ने आवाज उठाउँदै आएका छन् ।