प्रदेश २ मा सबभन्दा बढी भ्रष्टाचार : केस बस्नेत

धीरुभाइ

७ पुष, सप्तरी । नेपाली कांग्रेसका केन्द्रीय सदस्य तथा पूर्व सञ्चार तथा सूचना प्रविधि मन्त्री मोहन बहादुर बस्नेतले प्रदेश २ मा सबभन्दा बढी भ्रष्टाचार भएको बताए । सप्तरीको शम्भुनाथ नगरपालिकामा सोमबार आयोजिक बृहद विरोध सभा तथा रक्तदान कार्यक्रमलाई सम्बोधन गर्दै उनले यस्तो बताएका हुन ।

नेपाली कांग्रेस शम्भुनाथ नगर कार्य समितिले आयोजना गरेको सो कार्यक्रममा उनले कम्युनिस्ट सरकारले भ्रष्टाचार गरे तर, सबभन्दा बढी भ्रष्टाचार कुन प्रदशेमा भयो भन्ने त्यो प्रदेश २ नम्बर हो भने । नगर सभापति सुरेन्द्र भगतको अध्यक्षतामा आयोजित कार्यक्रममा पूर्व मन्त्री बस्नेतले मधेसी जनताको रगतको होली खेलेर मधेसवादी दलहरु जितेको स्थानीय तहहरुमा पनि भ्रष्टचार प्रदेश भन्दा कम नरहेको बताए ।

कम्युनिस्ट सरकार र प्रदेश २ सरकारको गतिविधिले नेपाली जनता आजित भइरसकेको उनले भने, कुन पार्टी संघीय लोकतान्त्रिक गणतन्त्रको पक्षधर हो, कुन विरोधी, त्यस बारे जानकारी गराउन नेपाली कांगेस जनताको घरदैलोमा पुग्नु पर्छ । भण्डाफोर गर्नुपर्छ ।

महालेखा परिक्षण प्रतिवेदनले ४५ प्रतिशत भ्रष्टाचार यसै प्रदेशमा र मधेशवादी जितेको स्थानीय तहमा भएको देखाएको प्रसँग उल्लेख गर्दै उनले यस विषयमा संसदमा पनि आवाज उठेको स्मरण गराए ।  कार्यक्रममा प्रदेश २ सभा सदस्य मो. समिम, नेपाली कांग्रेस सप्तरी सभापति दिनेशकुमार यादव, क्षेत्र ४ सभापति किरण भगत, पूर्व सभासद् सुरेन्द्र यादव, जिल्लाका पूर्व सचिव सबुरलाल साह, पूर्व क्षेत्रीय सभापति भगवती प्रसाद यादव लगायतले सम्बोधन गरेका थिए ।

दश जनाद्वारा रक्तदान

त्यस्तै, आयोजित रक्तदान कार्यक्रममा अमेन्द्र यादव, इन्द्रनारायण साह, शिवनारायण चौधरी, धनी लाल चौधरी, अशोककुमार साह, ललितकुमार चौधरी लगायत दश जनाले रक्तदान गरेका छन ।