पुष २९ मा सेञ्चुरी बैंकले बोलायो दुई वर्षको एकैपटक साधारणसभा

८ पुष, काठमाडौं । सेञ्चुरी कमर्सियल बैंकले दुई वर्षको साधारणसभा एकैपटक बोलाएको छ । कोरोना महामारीका कारण रोकिएको आर्थिक वर्ष २०७५/७६ (नवौं) र आर्थिक वर्ष २०७६/७७ (दशौं) वार्षिक साधारणसभा गर्न एकै पटक बोलाएको हो ।

बैंकले पुष २९ गते दुवै आर्थिक वर्षको साधारण सभा आर्मी अफिसर्स क्लब भद्रकाली काठमाडौंमा भिडियो कन्फ्रेन्समार्फत बिहान ११ बजेदेखि सुरु गर्ने जनाएको छ ।

सेन्चुरीले आर्थिक वर्ष २०७५/७६ को वार्षिक साधारण सभा २०७६ चैत १२ गते बोलाएको भएपनि कोभिड महामारीका कारण स्थगित भएको थियो । उक्त आर्थिक वर्षको नाफाबाट प्रस्तावित २ प्रतिशत बोनस शेयर र ४.७५५ नगद लाभांश पारित गर्न सभामा लैजाने छ ।

उक्त वार्षिक साधारण सभाका लागि २०७६ फागुन ३० गते नै बुक क्लोज भइसकेको छ । फागुन २९ गतेसम्म कायम रहेका सेयरधनीले मात्र आव २०७५/७६ को लाभांश पाउनेछन् ।

बैंकले आर्थिक वर्ष २०७६/७७ को नाफाबाट ५.२५ प्रतिशत बोनस शेयर र कर प्रयोजन सहित २.२५ प्रतिशत नगद लाभांश वितरण गर्न लागेको छ । बैंकले आ.व. २०७५/७६ को वितरण हुन बाँकी २ प्रतिशत अर्थात १६ करोड ८३ लाख रुपैयाँ बराबरको बोनस समेत गरी कायम ८ अर्ब ५८ करोड रुपैयाँ चुक्ता पुँजीमा उक्त लाभांश दिन लागेको हो ।

दशौं वार्षिक साधारण सभाका लागि बैंकले पुस १६ गते बुक क्लोज गर्नेछ । यसर्थ, पुस १५ गतेसम्म कायम शेयरधनीहरुले मात्र गत वर्षको लाभांश पाउने छन् ।