पुष १४ सम्म कायम शेयरधनीले ग्लोबल आइएमईको प्रस्तावित लाभांश पाउने

८ पुष, काठमाडौं । पुष १४ सम्म कायम शेयरधनीले ग्लोबल आइएमईको प्रस्तावित लाभांश पाउने भएका छन् । साधारण सभा प्रयोजनका लागि पुस १५ गतेदेखि पुस २९ गतेसम्म बुक क्लोज हुनेछ । सोही कारण पुस १४ गतेसम्म कायम रहने शेयरधनी मात्र प्रस्तावित लाभांश पाउने भएका हुन् ।

ग्लोबल आइएमई बैंक लिमिटेडले पुस २९ गते १४ औं वार्षिक साधारण सभा गर्ने जनाएको छ । बैंकले गत वर्षको नाफाबाट १४ प्रतिशत बोनस शेयर र २ प्रतिशत नगद लाभांश वितरण गर्ने प्रस्ताव सभामा लैजानेछ । आर्थिक वर्ष २०७५/७६ मा २५.५० प्रतिशत लाभांश वितरण गरेको बैंकको यस वर्ष लाभांशमा गिरावट आएको छ ।

बैंकले संस्थापक शेयरधनी समूहबाट ३ जना र सर्वसाधारण शेयरधनी समूहबाट पनि ३ जना नै गरी कुल ६ जना सञ्चालकहरुको निर्वाचन पनि गर्ने भएको छ । प्रबन्धपत्र तथा नियमावली संशोधन गर्ने प्रस्ताव पनि पेश हुनेछ । अन्य कुनै बैंक तथा वित्तीय संस्थासँग मर्जर वा एक्विजिसनमा जानु परेमा सम्पूर्ण अख्तियारी सञ्चालक समितिलाई दिने प्रस्ताव पनि रहेको छ । साथै, आर्थिक वर्ष २०७६/७७ को वार्षिक प्रतिवेदन, नाफा–नोक्सान हिसाब तथा नगद प्रवाह विवरणमा पनि छलफल गरी पारित गर्ने प्रस्ताव छ । सभा बैंकको रजिष्टर्ड कार्यालय, कमलादी काठमाडौंमा बिहान १० बजे सुरु हुनेछ । सभा भर्चुअल माध्यमबाट सञ्चालन गरिने बैंकले जानकारी गराएको छ ।