रामेछापका दर्जनौं युवा नेकपा परित्याग गरि कांग्रेसमा प्रवेश

९ पुष, काठमाडौं ।  रामेछाप जिल्लाका ४ दर्जन बढी युवाले नेपाल कम्युनिस्ट पार्टी परित्याग गरि नेपाली कांग्रेसमा प्रवेश गरेका छन् । नेपाली कांग्रेस रामेछाप काठमाडौं सम्पर्क समितिले बिहीवार काठमाडौंको बानेश्वरमा आयोजना गरेको पार्टी प्रवेश कार्यक्रममा रोशन बुढाथोकीको नेतृत्वमा प्रवेश गरेका हुन् ।

जसमा हिरा श्रेष्ठ, कृष्ण श्रेष्ठ , सुजन मोक्तान, कृष्णहरी खड्का लगाएत ६३ जना युवाले नेपाल कम्युनिस्ट पार्टी परित्याग गरि नेपाली कांग्रेसमा प्रवेश गरेको नेविसंघ निवर्तमान केन्द्रिय सदस्य एवं रामेछाप कांग्रेसका युवा नेता रत्नहरि ढुंगेलले जानकारी दिए ।

साथै नवप्रवेशीहरुलाई नेपाली कांग्रेसका केन्द्रिय सदस्य प्रदिप पौडेलले पार्टी सदस्यता प्रदान गरेका थिए भने जिल्ला सभापति लवश्री न्यौपाने , पुर्व सभापति रामचन्द्र खड्का लगाएतले स्वागत गरेका ढुंगेलले बताए ।

कार्यक्रममा सम्बोधन गर्दै नेता पौडेलले कांग्रेसले सधैं नयाँ पुस्तालाई हौसला हुने काम मात्र गर्छ कुनैदिन पनि कांग्रेस प्रवेश गरेकामा तपाईंहरुलाई पश्चाताप हुने छैन भन्दै मुलुकको सबै समस्याको समाधानको नाम नै नेपाली कांग्रेस भनेको बताए ।

मन्तव्यको अधिकांश समय केपी ओली नेतृत्वको सरकारको आलोचना गरेका नेता पौडेलले प्रतिनिधिसभा विघटनको भुललाई अदालतले सच्याउनु पर्ने धारण व्यक्त गरे । कार्यक्रम नेपाली कांग्रेस रामेछाप-काठमाडौं सम्पर्क समितीका सभापति राजनारायण श्रेष्ठको अध्यक्षतामा सम्पन्न भएको थियो ।