२८ दिन मात्र सांसद हुने अभागी पाण्डे

९ पुष, काठमाडौं । झण्डै एक महिनाअघि नेपाली कांग्रेसबाट मोहनप्रसाद पाण्डे सांसद बने । कांग्रेसले प्रतिनिधिसभाकाे समानुपातिकतर्फ रिक्त रहेको पदमा स्याङ्जा घर भएका मोहनप्रसाद पाण्डेलाई सांसद बनाएपछि उनले  २८ दिन अघि शपथ पनि खाए ।

उनले शपथ खाएपनि संसद छिर्न भने पाएनन् । प्रधानमन्त्री केपी शर्मा ओलीले आफूमाथि अविश्वासको प्रस्ताव दर्ता हुने डरले संसद अधिवेशन अन्त्य गरेका थिए । मंसिर ८ गते सांसद बनेका उनले शपथ खाएपनि संसद भने छिर्न पाएनन् ।

सांसद बनेको २८ दिनमा उनी संसद छिर्न त परको कुरा, सांसदको भत्ता र तलब समेत खान पाएनन् । सांसद बनेर पनि भत्ता र तलब खाने बेला प्रधानमन्त्री ओलीले संसद नै विघटन गरिदिएपछि उनी अभागी सांसद बन्न पुगेका हुन् ।

स्याङ्जा कालीगण्डकी गाउँपालिका वडा नम्बर ३ का पाण्डेलाई कांग्रेसको सिफारिस अनुसार निर्वाचन आयोगले प्रतिनिधिसभा सदस्य पदमा निर्वाचित भएको प्रमाणपत्र दिएको थियो । कांग्रेसले गत २०७४ सालमा आयोगमा बुझाएको बन्द सूचीमा समानुपातिकतर्फ पाण्डेको नाम थियो।

कांग्रेसका सांसद कास्कीका सूर्यबहादुर केसीको निधन भएपछि रिक्त पदमा पाण्डे नियुक्त भएका थिए । उनी मात्रै होइनन, सांसद बनेको साढे तीन बर्षमा चुनावी खर्च समेत उठाउन नपाएका अरु सांसद पनि यतिबेला बेरोजगार बनेका छन् । तलब भत्ता आउने संसद नै विघटन भएर बन्द भएपछि अरु सांसद पनि बेरोजगार बनेका हुन् ।