प्रभु लाइफको साधारण शेयर बाँडफाँड, १० कित्ताका दरले ५ लाख ४० हजारले पाए शेयर

१० पुष, काठमाडौं । प्रभु लाइफ इन्स्योरेन्सले सर्वसाधारणमा निष्काशन गरेको साधारण शेयर आज बाँडफाँड भएको छ । शेयर आवेदन गर्नेहरु मध्य प्रत्येकले १० कित्ताका दरले ५ लाख ४० हजार जनाले पाएका छन्।

कम्पनीको आईपीओमा १० लाख ५१ हजार २१६ जनाले आवेदन गरेकोमा ५ लाख ४० हजारलाई मात्र शेयर परेको हो । आवेदन गर्ने मध्य २ हजार १६९ जनाको आवेदन रद्ध भएको छ । सदर आवेदन १० लाख ४९ हजार ४७ लाई गोलाप्रथाबाट उक्त शेयर वितरण गरिएको शेयर बिक्री प्रबन्धक सिद्धार्थ क्यापिटलले जनाएको छ । क्यापिटलले आज बिहान ११ बजे शेयर बाँडफाँड गरेको थियो ।

कम्पनीको शेयरमा आवेदन गरेका ५ लाख ९ हजार ४७ जनाले भने आईपीओ पाउन सकेनन् । कम्पनीले मंसिर २९ गते देखि पुस २ गतेसम्म कूल ६० लाख कित्ता आईपीओ निष्काशनमा ल्याएको थियो ।

सो मध्ये सामुहिक लगानी कोष र कम्पनीका कर्मचारीलाई ३/३ लाख कित्ता छ्ट्टाएर ५४ लाख कित्ता शेयरका लागि सर्वसाधारणबाट आवेदन माग गरिएको थियो ।

कम्पनीको आईपीओमा कुल १० लाख ५१ हजार ५१६ वटा आवेदनबाट सर्वसाधारणबाट माग गरिएको ५४ लाख कित्ताको ५.१६ गुणा बढी अर्थात २ करोड ७८ लाख ६८ हजार ८८० कित्ता शेयरको माग परेको थियो । आईपीओ बाँडफाँड भएसँगै प्रभु लाइफको चुक्ता पूँजी दुई अर्ब पुगेको छ ।