साँझ क्याबिनेट, संकटकाल लाग्ला ?

१० पुष, काठमाडौं । बाग्मती प्रदेशका मुख्यमन्त्री डोरमणि पौडेलविरुद्ध नेकपाकै प्रचण्ड–माधव समूहले अविश्वास प्रस्ताव दर्ता गरेपछि संघीय सरकारसमेत हल्लिएको छ । नेकपा दुई चिरामा विभक्त भएपछि ६ वटै प्रदेशमा रहेका नेकपाका प्रदेश सरकारहरु प्रभावित हुने अवस्था रहेको छ ।

यसको शुरुवात बाग्मती प्रदेशबाट थालिएकाले त्यसलाई निष्प्रभावी गर्न प्रधानमन्त्री केपी ओलीले नयाँ कदम चाल्ने अनुमान गरिएको छ । आज साँझ ६ बजे प्रधानमन्त्री ओलीले मन्त्रिपरिषद बैठक डाकेका छन् ।

स्रोत भन्छ– आजको मन्त्रिपरिषद बैठकको अजेण्डा यही नै रहेको छ ।  संघीय संसद्मा आफ्नो सरकारविरुद्ध अविश्वास प्रस्ताव आउने निश्चित भएपछि ओलीले गत पुष ५ गते संसद विघटन गराएका थिए ।

अहिलेपनि प्रदेशसभा विघटन वा संकटकाल लगाउन मिल्ने गरी कदम चाल्न ओली तम्तयार रहेको बुझिएको छ ।  सरकारविरुद्ध नेकपा प्रचण्ड– नेपाल पक्ष मात्र होइन , प्रमुख प्रतिपक्षी नेपाली कांग्रेसलगायत राजनीतिक दलहरुले सडक संघर्ष गर्न थालेकाले पनि ओली त्यसबाट जोगिन संकटकाल लगाउने पक्षमा रहेका छन् ।

सम्भवतः आजको बैठकमा त्यही विषयमा छलफल हुने छ – स्रोत भन्छ ।