केपी ओली गोपन सर्प हो : झलनाथ खनाल

१० पुष, काठमाडौं । पूर्वप्रधानमन्त्री झलनाथ खनालले प्रधानमन्त्री केपी शर्मा ओली गोपन सर्प भएको बताएका छन् । पार्टीको केन्द्रीय कमिटीको बैठकका निर्णयहरु सार्वजनिक गर्न शुक्रबार आयोजित पत्रकार सम्मेलनमा वरिष्ठ नेता समेत रहेका खनालले महाधिवेशनमा आफूले हराएपछि ओलीले बदला लिन खोजेको समेत टिप्पणी गरे ।

‘गोमन सापलाई कसैले हिर्कायो र भाग्यो भने उसले हिर्काउने मान्छेको तस्वीर दिमागमा राख्ने र मौका पाउँदा ठुंङ्ग्ने गर्छ’ खनालले भने, ‘पार्टीको महाधिवेशनमा उहाँले हार्नु भएको थिया । अहिले त्यसैगरी बदला लिन खोज्नु भएको छ । जसको चरित्र गोपन सर्पकै जस्तो छ’ खनालले भने ।

पार्टी फुटाउन संसदीय दल र केन्द्रीय कमिटीमा ४० प्रतिशत बहुमत चाहिने खनालको भनाई छ । ‘अहिले संसद भंग गरेको अवस्थामा केन्द्रीय कमिटीमा ४० प्रतिशत चाहिन्छ । त्यसैले नेकपा फुटेको छैन, चोइट्याउन खोजेको हो’ उनले भने ।