नेकपाको विभाजनमा प्रचण्डले राप्रपाकै नियती भोग्नुपर्ने कमल थापाको चेतावनी

११ पुष, काठमाडौं । राष्ट्रिय प्रजातन्त्र पार्टी राप्रपाका अध्यक्ष कमल थापाले प्रचण्ड-माधव समूहले वैधानिकता पाउनेमा शंका व्यक्त गरेका छन् । अध्यक्षद्वय पुष्पकमल दाहाल र मावधकुमार नेपालले पार्टी वैधानिकताको दाबी गर्दै हिजो निर्वाचन आयोगमा पुगेका थिए ।

तर आफूले राप्रपा विभाजनको घटना सम्झिएको भन्दै उनले सोही नियती प्रचण्ड र माधव नेपालले पनि व्यहोर्ने चेतावनी दिएका हुन् । तत्कालीन समयमा निर्वाचन आयोगले प्रचण्डकै प्रत्यक्ष दबाबमा विनासनाखत कानुनविपरीत राप्रपा विभाजनको घोषणा गरिदिएको आरोप लगाउँदै उनले अहिले प्रचण्ड–माधव समूहलाई त्यस्तै हुनसक्ने संकेत गरे ।

शनिबार बिहान अध्यक्ष थापाले फेसबुकमा लेखेका छन्, ‘तत्कालीन प्रम प्रचण्डको प्रत्यक्ष दबाब र प्रभावमा त्यसवेला विनासनाखत कानुनविपरीत आयोगले राप्रपा विभाजन घोषणा गरेको थियो । प्रचण्डले त्यही नियति भोग्नु नपरोस । मेरो शुभकामना छ ।’