नयाँ भाइरस ठूलो चुनौती:- जनस्वास्थ्य विज्ञ डा. रवीन्द्र पाण्डे

१३ पुष, काठमाडौं । कोरोना महामारीको दोस्रो लहरको चपेटामा परेको युरोप अहिले म्युटेसन भएर नयाँ भेरिएन्टको रुपमा बेलायतबाट अर्को अध्यायमा प्रवेश गर्ने जोखिममा छ । बेलायतको दक्षिणपूर्वी क्षेत्रबाट फैलिएको यो प्रजातिको भाइरसले सिंगो बेलायतलाई असर गरेको छ भने आयरल्याण्ड, फ्रान्स, जर्मनी, दक्षिण अफ्रिका, जापान लगायतका देशमा पनि यो भाइरस भित्रिएको छ ।

नयाँ प्रजातिको यो भाइरसको अरुलाई सर्ने दर तीब्र छ । यसको घातकता अझै निश्चित भएको छैन । हालै जापानमा समेत यो भाइरस देखा परेपछि त्यहाँ प्रतिबन्ध नै लागेको छ ।

त्यसैले नेपालले पनि एयरपोर्ट तथा सीमानामा कडाइ नगर्ने हो भने तथा जनस्वास्थ्यका मापदण्ड अनिवार्य रुपमा अबलम्बन नगर्ने हो भने महामारी फेरी दोहोरिन सक्ने जनस्वास्थ्य विज्ञ डा. रवीन्द्र पाण्डेले चेतावनी दिएका छन् । नेपालबहससँग कुरा गर्दै डा. पाण्डेले भने, “घातक प्रभाव कम भएपनि जोखिम वर्गका व्यक्ति तथा कमजोर स्वास्थ्य प्रणालीको लागि यो नयाँ भाइरस ठूलो चुनौती हुनेछ ।”

“हाम्रो देशमा अहिले आन्दोलनको मौसम छ । दैनिक भइरहेका भीडभाडयुक्त बैठक, प्रदर्शनी, जुलुस, नाराबाजी आदिको कारण संक्रमण फैलिने ठूलो खतरा छ” उनले भने । जनस्वास्थ्य विज्ञ डा. पाण्डेका अनुसार अहिले महामारीको अवस्था कम भएको बेला हामी सबैले अनिवार्य र सहि तरिकाले मास्क लगाउने तथा भीडभाड नगर्ने हो भने हामी सुरक्षित हुनेछौं ।  बिरोध तथा भेलाको स्वरूप बदलेर जनस्वास्थ्यका मापदण्ड पालना गर्नु र गराउनु नितान्त जरुरी छ ।

“जसरी वुहानबाट सुरु भएको महामारी संसारभर फैलियो, त्यसैगरि बेलायतबाट सुरु भएको नयाँ प्रजातिको महामारी सबै देशमा नपुग्ला भन्न सकिदैन” डा. पाण्डेको चेतावनी छ । सरकारले यो नयाँ प्रजातिको भाइरसको रोकथाम गर्नको लागि आवश्यक रणनीति बनाउनु अत्यावश्यक भैसकेको डा. पाण्डेले बताए ।

योजनाबद्ध रुपमा निगरानी, परीक्षण, आइसोलेसन, उपचार क्षमता प्रबद्धर्न तथा खोप ल्याउने काममा निष्क्रिय हुने छुट सरकारलाई नभएको बताउँदै डा.पाण्डेले आम जनता भने यो प्रजातिबाट आत्तिनु नपर्ने बताए । डा. पाण्डेका अनुसार यसको घातकता अर्को कोरोना भाइरस भन्दा बढी छैन र अहिले बनेका खोप यो प्रजातिको लागि पनि उपयोगी हुने भनेर वैज्ञानिकहरुले बताएका छन् ।