कम्युनिष्टसँग कहिल्यै सहकार्य गर्नु हुँदैन:- कांग्रेस नेता शेखर कोइराला

१३ पुष, विराटनगर । नेपाली कांग्रेस प्रभावशाली केन्द्रीय सदस्य डा. शेखर कोइरालाले प्रधानमन्त्री केपी ओलीले गरेको संवैधानिक ‘कू’ नसचिञ्जेल कांग्रेसले सडक संघर्ष गरिरहने बताएका छन् । अहिलेको सरकारमा गएर कांग्रेस ओलीको मतियार बन्नु हुँदैन र त्यसका लागि खबरदारी गरिरहने र कांग्रेसलाई सरकारमा जान नदिने नेता कोइरालाको भनाई थियो ।

संसद विघटनविरुद्ध कांग्रेसले सोमबार विराटनगरमा आयोजना गरेको विरोध प्रदर्शनलाई सम्बोधन गर्दै कोइरालाले सडकबाटै कांग्रेसले मुलुकलाई निकास दिने दावी गरेका छन् । उनले भने, ‘अधिनायकवादी ओली नेतृत्वको सरकारले सर्वोच्चको फैसलापछि पनि निर्वाचनमा जाल जस्तो लाग्दैन, त्यसैले संघर्ष जारी राख्नु पर्छ ।’

लोकतन्त्र जोगाउन र संविधानको संरक्षणको जिम्मेवारी अहिले कांग्रेसको काँधमा आएको कोइरालाको भनाई थियो । ‘कांग्रेस आफ्नो दायित्व र जिम्मेवारीबाट भाग्न मिल्दैन र भाग्दैन,’ कोइरालाले भनेका छन् । ‘केपी ओलीलाई अधिनायकवादी बनाउनुमा दाहाल–नेपाल दुवैको भूमिका महत्वपूर्ण थियो,’ उनले भने, ‘संसद्‌मा ल्याएको विधेयकमा दाहाल–नेपालले सघाएकै कारण मुलुक अधिनायकवादतर्फ लागेको हो ।’

ओली नेतृत्वको सरकारले गरेको ठूलाठूला भ्रष्टाचारमा दाहाल–नेपालले कहिल्यै विरोध नगरेर मतियार बनेको कोइरालाको आरोप थियो । ‘त्यसैले कांग्रेस कसैसँग सहकार्य गरेर नभई आफ्नै आत्मबलले मुलुकलाई निकास दिन सक्षम छ र दिन्छ,’ उनले भने, ‘बीपी कोइरालाले कम्युनिष्टसँग कहिल्यै सहकार्य गर्नु हुँदैन भनेको कांग्रेसले सम्झिनु पर्ने बेला आएको छ ।’

सो कार्यक्रममा कांग्रेस केन्द्रिय सदस्य डीला संग्रौला, प्रदेश १ का कांग्रेसका प्रमुख सचेतक केदार कार्की, प्रदेशसभा सदस्य चुमनारायण तबदारलगायतले आ–आफ्ना विचार व्यक्त गरेका थिए । वीरेन्द्रसभाबाट सुरु भएको हजारौंको विरोध जुलुस जनआन्दोलन चोकमा गएर सभामा परिणत भएको थियो ।