ओलीको कदमविरुद्ध वैद्य र विप्लव एकैथलोमा

१४ पुष, काठमाडौं । प्रधानमन्त्री केपी ओलीले प्रतिनिधिसभा भंग गरेपछि विकसित राजनीतिक घटनाक्रमले पूर्व माओवादीहरुलाई एकैथलोमा ल्याइदिएको छ ।

पूर्व माओवादीबाट अलग भएका मोहन बैद्य ‘किरण’ र नेत्रबिक्रम चन्द ‘विप्लब’ नेतृत्वको पार्टीहरु प्रतिनिधिसभा विघटन विरुद्ध सहकार्य गर्ने अवस्थामा आइपुगेका छन् ।

‘ओलीको कदम निरंकुश, फासीवादी र उनको पार्टीको पार्टीको आन्तरिक मामिला नभएर दलाल तथा प्रतिक्रियावादी संसदीय व्यवस्थाको द्योतक हो’ चार पार्टीको मोर्चाबन्दीपछि जारी गरिएको विज्ञप्तीमा भनिएको छ।

वर्तमान संविधानको विरोध गर्ने यी दुई राजनीतिक शक्तिसँगै अरु दुई वटा राजनीतिक पार्टीले रणनीतिक संयुक्त मोर्चा बनाएका छन् । ओली कदमको विरोधमा ऋषिराम कट्टेलको नेपाल कम्युनिष्ट पार्टी र आहूति नेतृत्वको बैज्ञानिक समाजवादी पार्टी पनि उभिएका छन् ।

यी चारवटै दलहरुले ओलीले प्रतिनिधिसभा विघटनमा देशी विदेशी शक्तिको आडमा भएको निश्कर्ष निकालेका छन् । उनीहरुको भनाई अहिलेको समस्या समाधान न त संसद पुनस्थापना वा मध्यावधि निर्वाचनले गर्ने भन्दै जनतन्त्र स्थापनाका लागि थप संघर्ष गर्नुपर्ने रहेको छ ।

चार पार्टीले गरेको मोर्चाबन्दीले तत्कालै आन्दोलनका कार्यक्रम घोषणा गर्ने योजना रहेको पनि बताएको छ । ‘ओलीको निरंकुशता र राज्यसत्ताविरुद्ध अग्रगामी राजनीतिक निकासको ऐतिहासिक पहलकदमीका निम्ति हामी ४ पार्टीको बीचमा रणनीतिक संयुक्त मोर्चा निर्माण गर्ने सहमति भएको छ’ विज्ञप्तीको चार नम्बर बुँदामा भनिएको छ, ‘यसको अवधारणा, संरचना र आगामी कार्यक्रम शीघ्र घोषणा गरिनेछ ।’