म कांग्रेस हुँ, त्यो भन्दा बढी राष्ट्रवादी हुँ : धनराज गुरुङ

१५ पुष, काठमाडौं । नेपाली कांग्रेसका केन्द्रिय सदस्य धनराज गुरुङले नेपाली राजनीतिमा अस्वभाविक रुपमा भारत र चीनको हस्तक्षेप बढेकोप्रति आपत्ति जनाएका छन् । नेपाली स्वाधिनतामाथि लगातार हस्तक्षेप भइरहेको भन्दै कांग्रेस केन्द्रिय सदस्य तथा पूर्व सांसद गुरुङले आपत्ति जनाएका हुन् ।

प्रधानमन्त्री केपी शर्मा ओलीले संसद विघटन गरेपछि उत्पन्न परिस्थितीमा भारत र चीनको चाँसो र हस्तक्षेपप्रति गुरुङले आपत्ति जनाएका हुन् । उनले नेपाली राजनीतिमा विदेशी हस्तक्षेप अस्वीकार्य भएको र भत्र्सनायोग्य रहेको पनि बताएका छन् ।

‘नेपाली राजनीतिमा भारत र चीनको चलखेल अस्वाभाविक रुपमा बढ्नु राष्ट्रिय स्वाधीनता माथिको हस्तक्षेप हो’ गुरुङले सामाजिक सञ्जाल फेसबुकमा लेखेका छन्, ‘म कांग्रेस हुँ, तर कांग्रेसभन्दा माथी म नेपाली हुँ, राष्ट्रवादी हुँ।’

नेपाली राष्ट्रियतामाथि खेलबाड नगर्न पनि उनले चेतावनी दिएका छन् । राष्ट्रियताभन्दा व्यक्तिगत महत्वाकांक्षा राखेर देशलाई विदेशीको क्रिडास्थल नबनाउन पनि उनले चेतावनी दिएका छन् ।

‘खवरदार नेताहरु ! राष्ट्रिय स्वाधीनता भन्दामाथि ब्यक्तिगत महत्वाकांक्षालाई राखेर देशलाई बिदेशीको क्रिडास्थल नबनाऊ।’ गुरुङले भनेका छन् ।