मेलमिलाप गर्नुको साटो ओली सरकार निरंकुश बन्यो : केसी

१६ पुष, काठमाडौं । नेपाली कांग्रेसका नेता अर्जुननरसिंह केसीले प्रधानमन्त्री केपी शर्मा ओली नेतृत्वको सरकारले निरंकुशता लादेर बीपीको मेलमिलाप नीतिप्रति लज्जा प्रकट गरेको बताएका छन् ।

नेपाली कांग्रेसका संस्थापक नेता विश्वेश्वरप्रसाद कोइरालाको मेलमिलाप नीति सन्दर्भमा फेसबुक स्टाट्स लेख्दै नेता केसीले वर्तमान सरकारले मेलमिलापको धज्जी उडाउँदै संविधानविरोधी निरंकुश कदम चालेको बताएका हुन् ।

‘निषेध, आरोप प्रत्यारोप, गैह्रजिम्मेवार प्रवृत्ति, निरंकुशता, संविधानको अंगभंग र संसद विघटनले मेलमिलाप आँफै लज्जित छ’ केसीले सामाजिक सञ्जालमा थप अगाडी लेखेका छन्, ‘लोकतन्त्र, विधिको शासन र सहअस्तित्वबिना मेलमिलाप हुदैन ।’

तत्कालिन बीपीले भारतीय भूमि छाडेर निरंकुश नै भएपनि राजा महेन्द्रसँग मेलमिलापको नीति लिएर स्वदेश फर्केको कठिन घडीमा पनि धैर्यता राखेर देश र जनताप्रति मेलमिलापको सन्देश दिएको नेता केसीले उल्लेख गरेका छन् ।