बामदेव किन गए खुमलटार ?

१७ पुष, काठमाडौं । पार्टी विभाजनपछि कतै नखुलेका नेकपा उपाध्यक्ष बामदेव गौतम अब भने एउटा पक्षमा उभिनैपर्ने निश्कर्षमा पुगेका छन् । आजैबाट सुरु राष्ट्रियसभा बैठकमा आफ्नो धारणा प्रष्ट गरेर जानुपर्ने अवस्था आएकाले गौतम एउटा कित्तामा बस्न बाध्य भएका छन् ।

यही अवस्थाले गर्दा गौतम आज बिहानै पुष्पकमल दाहाल प्रचण्डलाई भेट्न खुमलटार पुगेका छन् । भेटमा गौतमले अब आफू एउटा पक्षमा खुल्नैपर्ने अवस्था आएको भन्दै एकपटक एकताको अन्तिम प्रयास गर्ने बताएको खुमलटार निकट स्रोतले जनाएको छ । यसका लागि गौतमले आजै प्रधानमन्त्री केपी ओलीसँग पनि भेट्ने तयारी गरेका छन् ।

सकेसम्म पार्टी मिलाएर लैजाने मेरो प्रयास छ, तपाईं पनि अलि लचकदार भैदिनुपर्छ भन्दै गौतमले प्रचण्डलाई भनेको उद्धृत गर्दै स्रोत भन्छ– अब धेरै दिनसम्म अनिर्णयको बन्दी नबन्ने पनि प्रष्ट पारेका थिए ।

जवाफमा प्रचण्डले भने ओलीले आफ्ना कमी कमजोरी सच्याएर आए फेरि पनि अध्यक्षसहित प्रधानमन्त्रीको जिम्मेवारी कायमै राख्ने वचन दिएका थिए । तर त्यसका लागि ओलीले विघटित प्रतिनिधिसभा तत्काल पुनस्थापना गर्नुपर्ने र विगतमा गरेका कमजोरीको सार्वजनिक रुपमा आत्मालोचना गर्नुपर्ने सर्त अघि सारेका छन् ।

गौतमले पनि प्रचण्डको सर्तकै वरिपरी बसेर ओलीसँग छलफल गर्ने बताएको स्रोतको दाबी छ ।