ओली दिल्ली जाने तयारीमा

१७ पुष, काठमाडौं । दुईतिहाई बहुमत नजिक रहेका प्रधानमन्त्री केपी ओलीले प्रतिनिधिसभाको हठात् विघटन गरेपछि यसमा देशी विदेशी शक्तिको हात रहेको धेरैले टिप्पणी गरे ।  विघटनको सिफारिश गर्दा ओलीले आफ्ना विश्वासप्राप्त कतिपय कानूनविद्वलाई समेत यसबारे सुइँको दिएका थिएनन् । ओलीको यस्तो शैली र प्रवृत्तिले निकट नेताहरु नै चकित भएका छन् । तर सबैले अनुमान गरे झैं यो प्रकरणमा कतै न कतै विदेशी शक्तिको हात हुन सक्ने अनुमान उनीहरुले समेत गरेका छन् ।

ओलीले यति ठूलो निर्णय लिंदा कानूनी क्षेत्रका राम्रो ज्ञातासमेत रहेका भित्रिया सुभाषचन्द्र नेम्बाङलाई कुनै छनक दिएनन् । नेम्बाङका लागि यो ठूलै झड्का थियो । तर आफूले मनपराएको नेता भएकाले उनी चूपै बसे । ओलीले उक्त निर्णय लिंदा निकट मन्त्रीहरुलाई त झनै पत्याएनन् । नत्र विघटनको सिफारिश गर्न बोलाइएको क्याबिनेट बैठकमा परराष्ट्रमन्त्री प्रदीपकुमार ज्ञवालीले विरोधमा आवाज उठाउने थिएनन् ।

किनभने यो प्रकरणमा कुनै न कुनै रुपमा विदेशी शक्तिकै हात रहेको देखिन्छ । केही सातादेखि नेपालमा उत्तरी र दक्षिणी छिमेकीबाट उच्चस्तरीय भ्रमण दलको लर्काे लागिरहेको थियो । चिनियाँ राजदूत यान्छी त खुलेरै मैदानमा ओर्लिएकी थिएन । साथै, चिनियाँ रक्षामन्त्रीसमेत आएर आफ्नाे प्रभाव देखाए ।

नेकपा भित्रको समस्या हल गर्न ओलीले एउटा पदबाट राजीनामा दिनु उपयुक्त हुन्छ भन्ने चीनको प्रष्ट धारणा पाएपछि परिस्थितिले अर्काे रुप लिएको हो । त्यसपछि ओलीको मोह चीन भन्दा भारततिर बढी देखियो । उनले भारतीय सेना प्रमुखदेखि खुफिया एजेन्सी रअ प्रमुखलाई बोलाएर राम्रो मन्त्रणा गरे । त्यसैका भरमा ओलीले प्रतिनिधिसभा नै विघटन गर्ने आँट गरे ।

दक्षिणी छिमेकीको यसमा कुनै न कुनै रुपमा संलग्नता रहेको आरोप पुष्टि गर्ने गरी ओलीले फेरि अर्काे तयारी थालेका छन् । पार्टी नै विभाजन गर्ने अवस्था आइसक्दासमेत ओली भने आफ्नो अभियानबाट तलमाथि नगर्ने गरी छिमेकीको ठूलो भर गरेका छन् । यही प्रयोजनका लागि ओलीले भारतको भ्रमण गर्ने तयारी थालेका छन् ।

भ्रमणको वातावरण बनाउन ओलीले परराष्ट्रमन्त्री ज्ञवालीलाई जनवरीको दोस्रो साता नयाँ दिल्ली भ्रमणमा पठाउँदै छन् । त्यसपछि ओली नै भारतीय समकक्षी नरेन्द्र मोदीको विशेष पाहुना भएर सयर गर्ने भएका छन् ।  यस्तो विषम परिस्थितिमा ओली दिल्ली जान किन आतूर भएका होलान् त ? जानकार भन्छन्– अब दिल्लीकै साथ र सहयोगमा निर्वाचन गरेर फेरि सत्तामा फर्कंदैछु भन्ने सन्देश दिन उनी भ्रमण गर्न तयार भएको हुनुपर्छ ।

तर यसले ओलीको नक्कली राष्ट्रवादी छवि त चकनाचूर होला नि त ? भन्ने प्रश्नमा एकजना विदेश मामलाका ज्ञाता भन्छन्– चुनाव अहिले हुँदैन । मंसिरको तयारी हुन्छ । दिल्लीले ओलीको नेतृत्व स्थापित गर्न नेपाली कांग्रेस र जनता समाजवादी पार्टीलाईसमेत वाध्य बनाइ दिनेछ । परिस्थिति हेर्दा त्यही दिशामा गएको अनुभूति हुन्छ । किनभने यस्तो गम्भिर अवस्थामा समेत ओली भारत भ्रमण गर्न तयार रहनुले धेरै अर्थ राख्छ ।