प्रदेश २ मा पनि ओली अल्पमतमा

१७ पुष, काठमाडौं । कुनैबेला दुई तिहाईको दम्भको उन्मादले गद्गद् देखिने केपी ओली पक्षीय नेता भन्ने गर्थे– दुई तिहाईलाई हेप्नी ? तर अहिले पार्टी विभाजन भइसकेको अवस्थामा भने ओली पक्ष जतातर्त रक्षात्मक अवस्थामाछ । संघीय सरकारले प्रतिनिधिसभा विघटन गरेपछि पार्टी विभाजित भएपनि सरकार भने काम चलाउ रुपमा चलेकै छ ।

यद्यपि ओली भने पूर्णकालिक सरकारकै हैसियतमा क्याबिनेट रिसफल गर्नेदेखि दीर्घकालिन प्रभाव पार्ने खालका निर्णय गर्न अभिसप्त छ । तर प्रदेश सरकार भने ओलीको नियन्त्रण बाहिर पुगेका छन् । जसको प्रत्यक्ष मार ओली पक्षीय मुख्यमन्त्रीहरुले खेपिरहेका छन् । खासगरी प्रदेश नं. १ र बाग्मती प्रदेशका मुख्यमन्त्रीविरुद्ध अविश्वास प्रस्ताव नै दर्ता भइसकेका छन् । एकले अर्काे पक्षलाई सिद्ध्याउने अभियान चलिरहेको छ ।

प्रदेश नं. १ मा ओली पक्षीय मुख्यमन्त्री शेरधन राई अल्पमतमा परेको बुझिएको छ । यस्तै , बाग्मती प्रदेशमा समेत मुख्यमन्त्री डोरमणि पौडेलको हालत खराब भइसक्यो ।  लुम्बिनी र गण्डकी प्रदेशमा भलै अहिले स्थिति नियन्त्रण बाहिर गइसकेको देखिंदैन । तर यो क्रम आगामी दिन तीब्र रुपमै जाने चाहिं निश्चितै छ ।

आजै मात्र प्रदेश नं. २ मा संसदीय दलका नेता रहेका ओली पक्षीय नेता सत्यनारायण मण्डलको पदसमेत धरापमा परेको छ । पार्टीको अर्काे पक्ष ( पुष्पकमल दाहाल प्रचण्ड– माधवकुमार नेपाल ) ले मण्डलविरुद्ध अविश्वास प्रस्ताव दर्ता गरेको छ ।  यो प्रदेशमा नेकपाका ३२ सांसद् रहेकाछन् । जसमा २० जना प्रचण्ड–माधव समूहका रहेको देखिन्छ । आज बिहानै १७ जना सांसद्ले मण्डलविरुद्ध हस्ताक्षर गरी संसदीय दलका उपनेता रामकुमार यादवलाई बुुझाएका छन् ।

यादवका अनुसार आजै संसदीय दलको बैठक बोलाएर मण्डललाई पदमुक्त गरिने तयारी भएको छ ।  यो क्रम विस्तारै अन्य प्रदेशमा समेत पुग्ने देखिएको छ । पार्टी विभाजनपछि ओली पक्ष संसदीय दल र पार्टीमा समेत अल्पमतमा परेको अवस्था छ ।