सुदूरका मुख्यमन्त्री भट्टले सम्हाले भौतिक पूर्वाधार मन्त्रालय

१७ पुष, कैलाली । भौतिक पूर्वाधार विकास मन्त्री पठानसिंह बोहरालाई पदमुक्त गरेका सुदूरपश्चिमका मुख्यमन्त्री त्रिलोचन भट्टले उक्त मन्त्रालयको जिम्मेवारी पनि आफैंले लिएका छन् ।

मन्त्री बोहरालाई पदमुक्त गरेसँगै तत्काल राजनीतिक नेतृत्व विहीन बनेको मन्त्रालय आफू मातहत राखेर मुख्यमन्त्री भट्टले कामकाज गर्न थालेका हुन्। भौतिक पूर्वाधार विकास मन्त्रालयको आधिकारीक वेबसाइटमा उनलाई मुख्यमन्त्री एवम भौतिक पूर्वाधार विकास मन्त्री भनेर उल्लेख गरिएको छ ।

ओली समूहका मन्त्री बोहोरालाई पदमुक्त गरे पनि दाहाल–नेपाल समूहभित्रबाट तत्कालै सो जिम्मेवारीका लागि मन्त्री नियुक्त गर्न नसकिने देखिएपछि मुख्यमन्त्री भट्टले आफैँ मन्त्रालय सम्हालेको बताइएको छ ।