ओलीलाई संघीयता खारेज गरिदिन सुझाव दिने सांसद को हुन् ?

१७ पुष, काठमाडौं । नेकपाका सांसदहरुले संघीयता खारेज गरिदिन प्रधानमन्त्री केपी शर्मा ओलीलाई सुझाव दिन थालेका छन् । पछिल्लो समय संसद विघटन गरेका ओलीलाई झन् तानाशाह बनाउने धुनमा रहेका नेकपा सांसद संघीयता खारेज गरिदिन हौस्याउन थालेका छन् ।

नेकपाकी सांसद निरुदेवी पालले संघीयता खारेज गरिदिन प्रधानमन्त्री ओलीलाई सुझाव दिएकी हुन् । पालले बिहीबार सामाजिक सञ्जाल फेसबुकमा स्टाट्स लेख्दै प्रधानमन्त्रीले संघीयता खारेज गर्नुपर्ने र प्रतिनिधिसभाको सिट संख्या १०५ मा झार्नुपर्ने बताएकी हुन् ।

राज्यलाई आर्थिक भार घटाउनका लागि संघीयता खारेज गर्नुपर्ने उनको तर्क छ । पछिल्लो समय ओली कित्तामा रहेकी सांसद पाल बेला बेला विवादास्पद अभिव्यक्तिका कारण चर्चामा आउने गरेकी छिन् ।