पार्टीको अन्तरविरोधले प्रतिनिधिसभा सहिद हुन पुग्याे : नेता शर्मा

१७ पुष, काठमाडौं । नेकपा नेता दीनानाथ शर्माले पार्टीभित्रको आन्तरिक किचलोका कारण प्रतिनिधिसभा विघटन भएको भन्दै यो अत्यन्तै दुःखद भएको बताएका छन् । शुक्रबारदेखि सुरु भएको राष्ट्रियसभा, हिउँदे अधिवेशनको पहिलो बैठकलाई सम्बोधन गर्दै शर्माले दलभित्रको द्वन्द्वको असर जनप्रतिनिधिमूलक संस्थामा पर्नु राम्रो नहुने बताए ।

प्रतिपक्षको अर्गेल्याइँको कारणले नभएर सत्तारुढ पार्टीभित्रकै कारणले विघटन हुन पुगेको उनले बताए । शर्माले पार्टी विभाजन रोक्नसक्ने केही तरिका भए पार्टी उपाध्यक्ष तथा राष्ट्रिय सभाका सदस्य वामदेव गौतमलाई आग्रह गरे ।

उनले भने, ‘हामी विभाजित हुन गइराखेका छौं । अझै पनि हामी एकठाउँमा हुनसक्ने सम्भावना छन्, त्यस्ता किसिमका समीकरण रसायनहरू छन् भने ती रसायनहरूबाट जोड्नका लागि प्रयत्न हुनेछ । त्यसका लागि प्रयासरत रहौं । वामदेव गौतमको प्रयत्न सफल रहोस् ।’

नेकपा विभाजन सिद्धान्त र दर्शनको आधारमा नभइ राजनीतिक कारणले हुन लागेको भन्दै शर्माले दुःख व्यक्त गरे । उनले नेकपा विभाजनबाट आफू चिन्तित भएको बताए । ‘यस्तो अवस्थामा हामी यहाँ उभिएका छौं ।

नेकपा बन्दाखेरि म सबैभन्दा खुसी थिए । नेपाली जनता खुसी थिए । विभाजनको संघारमा हुँदा मेरो मुटु चिरिएको, मुटु फुटेको अनुभव गरेको छु । इतिहासमा जुट्यौं पनि फुठ्ट्यौं पनि । विगतका फुटहरूमा मलाई यती धेरै पीडा हुने थिएन,’ उनले भने ।