पक्राउ परेकाे भोलिपल्टै छुटे चिनी मिल सञ्चालक

१७ पुष, काठमाडौं । उखु किसानलाई भुक्तानी नदिएपछि पक्राउ परेका लुम्बिनी चिनी मिलका सञ्चालक भोलिपल्टै छुटेका छन् । पश्चिम नवलरपरासीको सुनवलस्थित लुम्बिनी चिनी उद्योगका सञ्चालक मनोज अग्रवाल शुक्रबार तारेखमा छुटेका हुन् ।

किसानहरूको भुक्तानी नदिएको भन्दै अग्रवाललाई प्रहरीले बिहीबार वीरगञ्जबाट नियन्त्रणमा लिएर नवलपरासी पुर्‍याएको थियो । अग्रवाल प्रहरी नियन्त्रणमा परेलगत्तै उद्योगले किसानहरूको भुक्तानी सुरू गरेको थियो ।

पहिलो चरणमा २ करोड बैंक खातामा जम्मा गरेको उद्योगले दैनिक रूपमा ३० देखि ४० लाख रुपैयाँ किसानहरूलाई इ–सेवामार्फत् भुक्तानी सुरू गरेको छ।

प्रहरी नियन्त्रणमा रहेका अग्रवालले शुक्रबार जिल्ला प्रशासन कार्यालयमा एक हप्ताभित्र उद्योगको नामसारी लगायत ऋणको लागि सुरू गरिएको बैंकिङ प्रक्रिया पूरा गरेर किसानको सम्पूर्ण बाँकी रकम भुक्तानी गर्ने लिखित प्रतिबद्धता जनाएपछि उनलाई एक हप्ताको तारेख दिएर छाडिएको प्रमुख जिल्ला अधिकारी सागरमणि पाठकले जानकारी दिए।

काठमाडौंमा आन्दोलन गर्न आएका एक जना किसानको भुक्तानी नपाएरै सरकारसँग सहमति भएको खबरबाट विक्षिप्त भएर हृद्यघातका कारण मृत्यु भएपछि प्रहरीले पक्राउ गरेको हो ।