कोरोनाले बन्द रहेका सबै क्षेत्र खुल्ने, मन्त्रिपरिषदले निर्णय गर्न बाँकी !

१९ पुष, काठमाडौं । कोरोना भाइरसका कारण बन्द रहेका सबै क्षेत्र अब खुल्ने भएका छन् । आइतबार बसेको कोभिड रोकथामसम्बन्धी बनेको उच्च स्तरीय निर्देशक समिति सीसीएमसी निर्देशक समितिको बैठकले आवश्यक परेमा विद्यालय, चलचित्र घर, जिमखानालगायतलाई बन्द गर्न सक्ने अधिकार जिल्ला कोभिड–१९ संकट व्यवस्थापन केन्द्रलाई दिएर हाललाई खुल्ला गर्ने निर्णय गरेको हो ।

सरकारको पूर्वनिर्णयअनुसार रोक लगाइएको सबै क्षेत्रहरुमा वर्तमान स्थितिको विश्लेषण गरी रोक लगाउन सक्ने गरी अधिकार जिल्ला कोभिड संकट व्यवस्थापन केन्द्रलाई दिएर हाललाई खुल्ला गर्न मन्त्रिपरिषदमा प्रस्ताव पठाउने निर्णय भएको छ । अब मन्त्रिपरिषद बैठकले निर्णय गरेपछि अहिले बन्द रहेका विद्यालय लगायत सबै क्षेत्र खुला हुने छन् ।