पुस २४ गते धनगढीकाे विशाल सभामा प्रधानमन्त्री ओलीले सम्बोधन गर्ने

२१ पुष, काठमाडौं । नेपाल कम्युनिस्ट पार्टी ‘नेकपा’ ‘ओली समूह’ले पुस २४ गते ‘शुक्रबार’ धनगढीमा बृहत जनसभा गर्ने भएको छ । नेपाल कम्युनिष्ट पार्टी ‘नेकपा’ ओली समूहका प्रदेश अध्यक्ष कर्णबहादुर थापाले सभाको तयारी तीव्र भएको जानकारी दिए ।

उनका अनुसार सभामा प्रधानमन्त्री केपी ओलीले सम्बोधन गर्ने कार्यक्रम तय भएको छ । धनगढीमा सोमबार आयोजित पत्रकार सम्मेलनमा अध्यक्ष थापाले बताएअनुसार जनसभाका लागि विभिन्न समिति गठन गरिएको छ ।  अध्यक्ष थापाको संयोजकत्वमा २ हजार ५२५ सदस्यीय मूल तयारी समिति गठन भएको छ ।

समिति गठनपछि सामाजिक सञ्जालमा समेत थापाले जानकारी लेखेका छन्, उनले यस्ताे लेखेका छन । नेपाल कम्युनिष्ट पार्टी सुदूरपश्चिम प्रदेश कमिटीको आयोजनामा यही पौष २४ गते शुक्रवारको दिन कैलाली जिल्लाको धनगढीमा रहेको खुला मञ्चमा दिउसो १२.०० विशाल जनसभा गरिदैछ । पौष १५ गते सुदुरपश्चिबाट विभिन्न कामको सिलसिलामा काठमाडौ उपत्यकामा रहेका अगुवा कार्यकर्ताको भेला भव्यताका साथ सम्पन्न गरिसकिएको छ ।

धनगढीको जनसभालाई सम्वोधन गर्न सम्माननीय प्रधानमन्त्री तथा पार्टी अध्यक्ष क. केपी शर्मा ओली आउनु हुनेछ । सम्पूर्ण सुदुरपश्चिमबासीलाई उक्त जनसभाका सहभागिताको लागि हार्दिक आमन्त्रण गर्दछु । माक्स र सामाजिक दुरी कायम गर्ने प्रवन्ध गरिनेछ । पार्टीका सवै नेता तथा कार्यकर्तालाई उक्त जनसभाको तयारीमा आजैदेखि योजनावद्धरुपमा सक्रिय हुन अनुरोध गर्दछु ।