अनेरास्ववियुले प्रधानमन्त्री ओलीको पुत्ला जलाउने, मन्त्रीलाई कालो झण्डा देखाउने

२१ पुष, काठमाडौं । संसद विघटनविरुद्ध सत्तारुढ नेकपाको प्रचण्ड–माधव समूह सम्बद्ध विद्यार्थी नेता आक्रोशित बनेका छन् । प्रचण्ड माधव समूहको अनेरास्ववियूले संसद विघटन गर्ने प्रधानमन्त्री ओलीविरुद्ध कडा आन्दोलनको कार्यक्रम घोषणा गरेको छ ।

बागबजारको अनेरास्ववियू कार्यालयमा बसेको बैठकले यही पुष २१ गतेदेखि २९ गतेसम्म आन्दोलनका कार्यक्रम सार्वजनिक गरेको हो । आन्दोलनका कार्यक्रमअनुसार आज सरकारका मन्त्रीहरुलाई कालो झण्डा देखाउने र प्रत्येक कलेजमा कालो ब्यानर राखेर विरोध प्रदर्शन गर्ने कार्यक्रम राखिएको छ ।

यसैगरी पुस २२ गते काठमाडौं उपत्यकामा लाल्टिन जुलुस र उपत्यका बाहिर आवश्यकता अनुसार लाल्टिन वा सिटी वा लाठी जुलुस निकाल्ने अनेरास्ववियूले जनाएको छ ।

पुस २३ गते देशभर प्रधानमन्त्री केपी शर्मा ओलीको पुत्ला जलाउने र २४ गते सिडियो कार्यालयमा ज्ञापनपत्र बुझाउँदै धर्ना दिने कार्यक्रम तय गरिएको छ ।

पुस २५ गते संसद विघटनको कदमविरुद्ध सडक बहस कार्यक्रम गर्ने, २६ गते बयलगाडा प्रदर्शन गर्ने र २७ गते प्रतिगमनको विरुद्ध सडक कविता, गीत र गजल कार्यक्रम गर्ने कार्यक्रम तय गरिएको छ ।

यसैगरी पौष २८ गते सडक नाटक र सडक आर्ट स्ट्रिट वाल पेन्टिङ गरी २९ गते सडकमा प्ले कार्ड सहित कार्टुन प्रदर्शन गरिने कार्यक्रम पनि तय गरिएको छ । तेस्रो चरणको आन्दोलनका कार्यक्रम भने माघ १ गते सार्वजनिक गरिने अनेरास्ववियूले जनाएको छ ।