कैँची प्रहार गरेर साथीको हत्या

२२ पुष, काठमाडौं । काठमाडौंमा एक जना भारतीय युवाको कैँची प्रहारबाट हत्या भएको छ । भारतको मोतिहारी घर भएर काठमाडौंको बाइसधारा बस्ने २५ वर्षीय सुवोध मियाँले आफ्नै साथी कलाम मियाँको हत्या गरेका हुन् ।

सुवोधले कैँची प्रहार गर्दा कलाम गम्भीर घाइते भएका थिए । उनको त्रिवि शिक्षण अस्पताल महाराजगञ्जमा उपचारको क्रममा मंगलबार राति नै मृत्यु भएको हो ।

दुवै जनाले सिलाइ कटाइको काम गर्थे । उनीहरु बीच पहिलादेखि नै सम्बन्ध राम्रो देखिदैन । मंगलबार राति आपसी विवाद हुँदा सुवोधले कलाममाथि कैँची प्रहार गरेर हत्या गरेका प्रहरीको भनाई छ ।

कलाममाथि कैँची प्रहार गरेपछि टाटा सुमो रिजर्भ गरेर भाग्दै गरेको अवस्थामा सुवोधलाई इलाका प्रहरी कार्यालय फर्पिङबाट खटिएको प्रहरी टोलीले पक्राउ गरेको हो ।