परराष्ट्रमन्त्री भारत जाँदै

२२ पुष, काठमाडौं । प्रधानमन्त्री केपी ओली भारतसँग सम्बन्ध सुधार्न मरिहत्ते गर्दैथिए । तर त्यसका लागि तारतम्य मिलेको थिएन । भारतसँग लामै समय पौंठाजोरी खेल्दा उनलाई घाटा भन्दा लाभ नै पुगेको थियो । ०७२ सालमा संविधान जारी गर्नेक्रममा ओलीले देखाएको भारत विरोधी अडानले गत आम निर्वाचनमा जादू नै चल्यो । उनले नसोचेको सफलता पाए । झण्डै दुई तिहाई समर्थन प्राप्त नेपालको सर्वेसर्वा र बलशाली प्रधानमन्त्रीको रुपमा उनी पदार्पण गर्न सफल भए ।

तर ओलीको सफलता र लोकप्रियता विस्तारै शिथिल हुन थाल्यो ,जब उनी भारत र अमेरिकाप्रति अलि बढी झुक्न थाले । भारतीय सिने जगतको लोकप्रिय आइफा आयोजना गर्न उनले दिएको एक अर्ब रुपियाँ र नेपाल भित्रने तरकारी र फलफुलमा रहेको विषादी परीक्षण नै गर्न नपर्ने उर्दीले ओलीको नक्कली राष्ट्रवाद छताछुल्ल भए ।

सँगै अमेरिकी सहयोग नियोग एमसीसी पारित गराउन ओलीले गरेको प्रयत्नले छिमेकी चीन चिढियो । त्यही क्रममा चीनले ओलीलाई प्रधानमन्त्री पद त्यागेर भएपनि नेकपा भित्रको एकता जोगाउन दबाब दिन थालेपछि भने ओली खुलेरै भारतीय पक्षको काखमा पुगे । यसका लागि उनले भारतीय गुप्तचरी संस्था रअ का प्रमुख सामन्तकुमार गोयलको साथ लिए ।

गोयलसँगको भेटघाटपछि ओली नरेन्द्र मोदीसँग सुमधुर सम्बन्ध स्थापित गर्न लालयित भएका छन् । मोदीको ग्रिन सिग्नल आएपछि ओलीले प्रतिनिधिसभा नै विघटन गरिदिएकाछन् । यो घटनाका सन्दर्भमा भारत मौन छ । आन्तरिक मामला भन्दै पर्ख र हेरको अवस्थामा रहेको प्रेस नोट भारतीय पक्षले जारी गरेको छ ।

तर ओली भने अब चीनबाट सहयोग नहुने निश्कर्षमा पुगेकाले भारतसँगै सम्बन्ध विस्तारमा हतारिएका छन् । त्यसका लागि उनी सकेसम्म आउने फेबु्रअरी भित्रै भारतको राजकीय भ्रमण गर्न लालयित छन् । त्यसैका लागि वातावरण तयार गर्न उनले परराष्ट्रमन्त्री प्रदीपकुमार ज्ञवालीलाई भारत भ्रमणमा पठाउने तयारी थालेका छन् ।

सम्भवतः माघको पहिलो साता नै ज्ञवाली भारत जाँदैछन् । उनले उपयुक्त वातावरण तयार गरेर आएको लगत्तै ओलीपनि भारत भ्रमणमा जाने तयारीमा रहेको स्रोतको भनार्ईछ ।