चर्काे आलोचनापछि इजलाशमा नबस्ने न्यायाधीश कार्कीको निर्णय

२२ पुष, काठमाडौं । न्यायाधीश हरिकृष्ण कार्कीले संसद विघटनविरुद्ध परेको रिटमाथि सुनुवाई गर्न गठित संवैधानिक इजलास छाड्ने घोषणा गरेका छन् । प्रतिनिधिसभा विघटनविरुद्ध परेका रिटहरुको सुनुवाईका लागि प्रधानन्यायाधीश चोलेन्द्रशम्शेर जबराले आफ्नो नेतृत्वको संवैधानिक इजलासमा न्यायाधीश कार्कीसहित ५ जनाको इजलास गठन गरेका थिए ।

आजको वहसमा वरिष्ठ अधिवक्ता शम्भु थापालगायत दिनेश त्रिपाठीले न्यायधीश कार्कीको निष्पक्षतामाथि प्रश्न उठाइएको थियो । विगतमा केपी ओली प्रधानमन्त्री रहँदा महान्याधिवक्ता रहेका कार्की वर्तमान न्यायधिवक्ता अग्नि खरेलका ल फर्म पार्टनरसमेत भएकाले उनीमाथि निष्पक्षताको प्रश्न उठाइएको थियो । साथै, कार्की भन्दा वरिष्ठ दुईजना न्यायधीशलाई सहभागी नगराइएकोमा समेत व्यापक आलोचना भएको थियो । संवैधानिक इजलासमा विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी पनि छन् ।

कार्की, केपी शर्मा ओली नेतृत्वको अघिल्लो सरकारमा महान्यायाधिवक्ता रहेकाले अहिले यो मुद्धा हेर्दा स्वार्थ बाझिने उनीहरुको तर्क थियो । सो तर्कपछि कार्कीको आलोचना हुदै आएको थियो । अर्का अधिवक्ता दिनेश त्रिपाठीले पनि कार्कीले ओली संलग्न मुद्दा हेर्दा स्वार्थ बाझिने बताएका थिए ।

आजै पनि कानून व्यावसायीहरुले यस्तो प्रश्न गर्दा प्रधानन्यायधीश चोलेन्द्रसम्शेर राणाले वचाउ गरेका थिए । उनले इजलाशबाट भनेका थिए– कार्की मात्र होइन, म पनि केपी ओलीकै सिफारिशमा नियुक्त भएकाले मैलेपनि नहेरौं त ?

सवैतिरबाट चर्काे आलोचना भएपछि आजको सुनुवाई अन्त्य गर्ने बेला न्यायधीश कार्की आफैं अबको सुनुवाईमा सहभागी नहुने बताएका थिए ।
प्रधानन्यायधीश राणाले आगामी बुधवार अर्काे सुनुवाईको मिति तोकेका छन् ।