ओली समुहबाट भीम रावललाई कारबाहीको सिफारिस

२३ पुष, काठमाडौं । आर्थिक अनियमितता गरेको भन्दै नेकपाका नेता भीम रावललाई सुदुरपश्चिम कमिटीले कारबाहीको सिफारिस गरेको छ । प्रदेश ईन्चार्ज लेखराज भट्टका अनुसार रावलले आर्थिक हिनामिना गरेकाले कारबाही गर्न सिफारिस गरेको हो ।

नेकपा विभाजन अघि रावल सुदुरपश्चिमका प्रदेश ईन्चार्ज थिए । तर ओली समुहले रावललाई ईन्चार्जबाट हटाएर आफ्ना नेता भट्टलाई ईन्चार्जमा नियुक्त गरेको थियो ।

ओली समुहका उद्योग मन्त्री भट्टले इन्चार्जको भूमिका पाएपछि बसेको पहिलो बैठकले रावललाई कारबाहीको सिफारिस गर्ने निर्णय गरेको जनाईएको छ । साथै सुदुरपश्चिम ओली समूहले रावलको इन्चार्जको जिम्मेवारी खोसे पनि केन्द्रीय कमिटी सदस्यबाट भने अझै हटाएको छैन् ।

नेकपा प्रचण्ड–माधव समूहको सुदूरपश्चिम इन्चार्ज रावलले भने वैधानिक नेकपा आफूहरु भएकाले पार्टी कोषबारे सोधखोज गर्ने अधिकार अर्को समूहलाई नभएको बताउँदै आएका छन् । ओली समूह प्रदेश बैठकले प्रदेश कमिटी समेत बिस्तार गरेको छ । यो समूहले सुदूरपश्चिम प्रदेश कमिटी ५५१ सदस्यीय बनाएको छ ।