अमेरिकामा कोरोना कहर अहिलेसम्मकै उच्च, एकैदिन ३ हजारको मृत्यु

२३ पुष, एजेन्सी । अमेरिकामा कोरोना भाइरसको कहर अहिलेसम्मकै उच्च देखिएको छ । जोन हप्किन्स विश्वविद्यालयका अनुसार बुधबार एकैदिन यहाँ ३ हजार ८६५ जनाको मृत्यु भयो । त्यस्तै, संक्रमित हुनेको संख्या १ लाख ४५ हजारभन्दा बढी रह्यो । । महामारी फैलिएयता यति ठूलो संख्यामा एकैदिन मानिसहरुले ज्यान गुमाएको यो पहिलोपटक हो ।

सत्ता हस्तान्तरणको विषयले अस्थिरता निम्तिदा अमेरिकी सरकारले जनताको स्वास्थमा पर्याप्त ध्यान पुर्याउन सकेको छैन । बुधबारै संसद् भवनमा राष्ट्रपति डोनाल्ड ट्रम्पका समर्थकहरुले हुलदङ्गा गर्दा एकजनाको घटनास्थलमै र तीन जनाको उपचारका क्रममा मृत्यु भयो । भावी राष्ट्रपति जो बाइडेनको विजय संसद्बाट अनुमोदन हुनबाट रोक्नका लागि ट्रम्पका समर्थकहरुले हुलदङ्गा गरेका थिए । यद्यपी, बाइडेनको जीत संसद्ले अनुमोदन गरेको छ र अब २० जनवरीमा उनले कार्यभार सम्हाल्नेछन् ।

अमेरिकामा २ करोड १८ लाखभन्दा धेरै जनसंख्या कोरोना भाइरसबाट संक्रमित भइसकेको छ । यसमध्ये १ करोड ३० लाखभन्दा धेरै जनसंख्या संक्रमणमुक्त भइसक्यो । ३ लाख ६९ हजार ९ सय ९० जनाले ज्यान गुमाइसकेका छन् । वल्र्डोमिटरका अनुसार अझै पनि ८४ हजारभन्दा धेरै जनसंख्या संक्रमित छ । अमेरिकाको छिमेकी मेक्सिकोमा पनि संक्रमितहरुको संख्या बढ्दैछ । पछिल्ला २४ घण्टामा यहाँ १३ हजार ३ सय ४५ जना नयाँ संक्रमित भेटिएका छन् ।