बैंकिङ क्षेत्रको सबैभन्दा ठूलो ८ अर्बको आईपीओ शुक्रबारदेखि निष्कासन हुँदै

१ माघ, काठमाडौं । बैंकिङ क्षेत्रको सबैभन्दा ठूलो ८ अर्बको आईपीओ नेपाल इन्फ्रास्ट्रक्चर बैंकले निष्कासन गर्ने भएको छ । बैंकले भोली (शुक्रबार माघ २ गते) देखि ८ अर्ब रुपैयाँ बराबरको ८ करोड कित्ता शेयर निष्काशन गर्न लागेको हो ।

हाल कम्पनीको जारी पूँजी रु २० अर्बको ४० प्रतिशतले हुन आउने रु ८ अर्ब रकम बराबरको प्रतिशेयर रु सय अंकित दरका ८ करोड कित्ता शेयर मध्ये ०.२०प्रतिशतले हुन आउने १ लाख ६० हजार कित्ता शेयर कर्मचारीहरुको लागि तथा ५ प्रतिशतले हुन् आउने ४० लाख कित्ता शेयर सामुहिक लगानी कोषका लागि बाँडफाँड गरी बाँकी ७ करोड ५८ लाख ४० हजार कित्ता साधारण शेयर सर्वसाधारणको लागि छुट्याइएको छ ।

बैंकको उक्त आईपीओलाई इक्रा नेपालले ‘इक्राएनपी आईआर त्रिपल बी’ रेटिङ्ग प्रदान गरेको छ । यसले कम्पनीको वित्तीय अवस्था मध्यम रहेको, समयमै वित्तीय दायित्व पुरा गर्ने सम्बन्धमा मध्यम सुरक्षित रहेको र मध्यम क्रेडिट जोखिम रहेको जनाउँछ।

बैंकले निष्कासन गर्न लागेको आईपीओमा लगानीकर्ताहरुले न्यूनतम १० कित्ता देखि बढीमा २ करोड कित्ताको लागि आवेदन दिन सक्नेछन् । उक्त आईपीओमा लगानीकर्ताले माघ २ गतेदेखि छिटोमा माग ६ गतेसम्म र ढिलोमा माघ १६ गतेसम्म आवेदन दिन सक्नेछन् ।

बैंकले जारी गर्न लागेको आईपीओको प्रत्याभूतकर्ता नागरिक लगानी कोष रहेको छ भने शेयर निष्काशन तथा तथा बिक्री प्रवन्धक एनआईबीएल एस क्यापिटल लिमिटेड रहेको छ।

बैंकको अधिकृत पूँजी ४० अर्ब, जारी पूँजी २० अर्ब र चुक्ता पूँजी १२ अर्ब रहेको छ । ८ अर्ब रुपैयाँ बराबरको आइपिओ निष्काशन गरेपछि बैंकको चुक्ता पूँजी २० अर्ब रुपैयाँ पुग्नेछ।