वैदेशिक राहत दिलाउने आश्वासन दिएर सर्वसाधारणलाई ठग्ने पक्राउ

१ माघ, काठमाडौं । क्यानाडाको टोरेन्टो विश्वविद्यालयबाट साहित्यमा पीएचडी गरेको हुँ भन्दै सीपमूलक तालिम र वैदेशिक राहत दिलाउने आश्वासन दिएर सर्वसाधारण ठगी गर्ने एक पुरुषलाई नेपाल प्रहरीले पक्राउ गरेको छ ।

गरिब र विपन्न वर्गलाई विभिन्न सीपमूलक तालिम दिने र वैदेशिक राहत सहायत दिलाउने आश्वासन दिँदै कर्मचारी परिचालन गरेर सदस्य बनाउँदै सर्वसाधारण ठगी गर्ने धनुषाको गणेशमान चारनाथ नगरपालिका– ८ का ४७ वर्षीय रामवलीकुमार दनुवारलाई प्रहरीले पक्राउ गरेको हाे ।

सुनसरीको इनरुवा नगरपालिका– १ मा शाखा खोलेर ३७ जना कर्मचारी नियुक्त गरी एक हजार एक सय ९७ जनालाई ठगी गरेको आरोपमा सुनसरी प्रहरीले पक्राउ गरेको हो । पिएचडी गरेको बताउने दनुवारका बारेमा प्रहरीले गरेको अनुसन्धानअनुसार उनले जम्मा १० कक्षासम्म मात्र पढेको देखिएको छ ।

प्रहरीका अनुसार दनुवारले आफूलाई डाक्टर बताउँदै क्यानडाको तिलिजा रोवर्ट नामको संस्थासँग समन्वय गरी विभिन्न कार्यक्रम सञ्चालन गर्ने गरेको भन्दै प्रदेश १ र २ अनि लुम्बिनी प्रदेशमा शाखा खोलेर सर्वसाधारणलाई सदस्य बनाएर ठगी गर्ने गरेका थिए । उनले संस्थाको सदस्य बनेबापत एक सयदेखि एक हजारसम्म शुल्क लिने गरेका थिए ।

उनले सरस्वती सिलाइ प्रशिक्षण केन्द्र रहेको र सप्तरीको माहुली र सुनसरीको इनरुवामा शाखा खोलेर प्रशिक्षण दिलाउन लागेको भन्दै सर्वसाधारणबाट भर्नाबापत जनही एक हजार शुल्क ठगी गर्ने गरेका थिए ।

उनले आफ्नो तालिम केन्द्रको दर्ता नं. ५९१६० रहको प्रधान कार्यालय रुपन्देहीको भैरहवा अनि महोत्तरीको गौशाला, सिराहा र धनुषामा पनि शाखाहरू खोलेर सिलाइबुनाइ, साबुन, मैनबत्ती बनाउने तालिम दिइरहेको अनि वैदेशिक सहायताबाट आएको राहत पनि वितरण गर्ने गरेको भन्दै सर्वसाधारणलाई सदस्य बनाउन लगाउने गरेका थिए ।

उनले तालिम केन्द्रको आफू महानिर्देशक भएको र मासिक एक लाख तलब खाने गरेको भन्दै प्रशिक्षण केन्द्रमा कर्मचारी, स्वास्थ्य निरीक्षक, उपमहानिर्देशक, कार्यालय प्रमुख, सहकार्यालय प्रमुख, लेखापाल, स्वकीय सचिव, निरीक्षक, कार्यालय सहयोगी र गार्डजस्ता पद सिर्जना गरेर परिचालन गर्ने गरेका थिए । उनले कर्मचारीलाई दर्जाअनुसार ११ हजारदेखि ५४ हजारसम्म पारिश्रमिकसमेत तोकेर ३७ जना कर्मचारी नियुक्त गरेका थिए ।