निःशुल्क गर्भ जाँच गर्न ग्रामीण अल्ट्रासाउण्ड कार्यक्रम

१ माघ, खोटाङ । गर्भवतीको निःशुल्क गर्भ जाँच गर्नका लागि साकेला गाउँपालिकामा ग्रामीण अल्ट्रासाउण्ड कार्यक्रम शुरु गरिएको छ । स्थानीय स्वास्थ्य संस्थामै गर्भजाँचको सुविधा बिस्तार गर्नका लागि गाउँपालिका र वनहर्ट वल्डवाइडको सहकार्यमा ग्रामीण अल्ट्रासाउण्ड कार्यक्रम शुरु गरिएको हो ।

वडा नं ३ खिदीमा स्वास्थ्यचौकीमा बुधबार स्थानीय गर्भवती महिलाको गर्भजाँच गर्दै ग्रामीण अल्ट्रासाउण्ड कार्यक्रमको औपचारिक उद्घाटन गरिएको छ । खिदीमामा आयोजित कार्यक्रममा गाउँपालिका अध्यक्ष अर्जुनकुमार खड्काले ग्रामिण अल्ट्रासाउण्ड कार्यक्रम उद्घाटन गरे।

सुरक्षित मातृत्वका लागि वनहर्ट वल्डवाइडले गर्भजाँच गर्ने उपकरण प्रदान गरेपछि तालिम प्राप्त एक अनमीको व्यवस्था गरेर ग्रामीण अल्ट्रासाउण्ड कार्यक्रम शुरु गरिएको गाउँपालिकाले जनाएको छ ।

केही समयपछि वडा नं १ बाँझेच्यानडाँडास्थित स्वास्थ्यचौकी र सामुदायिक स्वास्थ्य एकाइ केन्द्र डाँडागाउँ, वडा नं २ रतन्छा स्वास्थ्यचौकी, वडा नं ४ मात्तिमस्थित आधारभूत स्वास्थ्य केन्द्र र वडा नं ५ मात्तिमबिर्तास्थित स्वास्थ्यचौकीमा ग्रामीण अल्ट्रासाउण्ड कार्यक्रम शुरु गरिने गाउँपालिकाका प्रमुख प्रशासकीय अधिकृत रवीन मगरले बताए ।