भोलि कांग्रेसको विरोधसभा, ७५३ क्षेत्रमै प्रदर्शनी हुने

२ माघ, काठमाडौं । प्रधानमन्त्री केपी ओलीको असंवैधानिक कदमविरुद्ध राजनीतिक शक्ति एकाकार हुँदैछन् । ओलीको गलत र असंवैधानिक निर्णयविरुद्ध दलहरुको सडक संघर्ष फेरि उत्कर्षमा पुग्न थालेको छ ।  खासगरी प्रमुख प्रतिपक्षी नेपाली कांग्रेसले ओलीको पक्षमा नरम नीति लिएको आरोप खेपेको अवस्थामा सभापति शेरबहादुर देउवा त्यसको प्रतिवाद व्यवहारबाटै गर्न उद्यत् देखिएका छन् ।

त्यसका लागि भोलि कांग्रेसले देशका ७५३ वटै स्थानीय तहमा विरोध कार्यक्रम गर्न निर्देशन दिएका छन् ।  ओलीको असंवैधानिक कदम विरुद्ध देशैभरका कार्यकर्तालाई सडकमा ओर्लन देउवाले आह्वान गरेका छन् ।  यस प्रयोजनका लागि सभापति देउवाले आज पार्टीका तर्फबाट प्रेस विज्ञप्ति जारी गर्दै सबै कार्यकर्तालाई अपील गरेका छन् ।

यसअघि पनि कांग्रेसले संसदीय निर्वाचन क्षेत्र र प्रदेशस्तरीय विरोध कार्यक्रमको आयोजना गरिसकेको छ ।  उता, कांग्रेसकै वरिष्ठ नेता रामचन्द्र पौडेलले पनि आज देशैभरिका नेता कार्यकर्तालाई भोलिको विरोध प्रशर्दन सफल पार्न आह्वान गरेका छन् ।  आज भिडियो कलमार्फत नेता पौडेलले प्रधानमन्त्री ओलीले नै आफूले असंवैधानिक कदम चालेको स्वीकारिसकेकाले त्यसका विरुद्ध सशक्त आन्दोलन गर्न सम्पूर्ण नेपालीलाई आह्वान गरेका छन् ।

पौडेलले भने – “ओलीजीले सर्वाेच्च अदालतमा दिएको प्रत्युउत्तरमा प्रतिनिधिसभा विघटन राजनीतिक कदम भएकाले सर्वाेच्च अदालतको क्षेत्राधिकार बाहिर भएको दावी गर्नु भनेकै आफ्नो काम असंवैधानिक हो भनेर स्वीकार्नु हो ।”