पर्खाइ सजिलो पार्न बेसरी पिएको हुँ

पर्खाइ सजिलो पार्न हजुर बेसरी पिएको हुँ ।
उनी फर्किँदा यहीँ हुनुछ त्यसैले जिएको हुँ ।

उनको नासो मैले राख्नुमा पनि खास कारण छ ,
धागो बाँधेको खामले डस्ला सोचेर नदिएको हुँ ।

फर्किनन् भने खाली आस दुख्ने हो,अरु केही हुन्न ,
म बिस्वासको चुचुरो बाट पहिल्यै पछारिएको हुँ ।

हिजो रात रङ्गियो , आज भनियो बेहोसीमा भयो ,
होसको सन्सारले घाँटी अठ्याउँदा छट्पटिएको हुँ ।

उसले छोडेनी तिमी जिउन सक्छौ , अनुभव भन्छ ,
म तिम्रा औँला समाउँदा समाउँदै त छोडिएको हुँ !