ग्राहक लुटपाट गरेका सिनेट क्लबका मालिकलाई प्रहरीले पक्राउ गरेर पनि किन छाड्यो ?

४ माघ, काठमाडौं । पर्यटकहरुको केन्द्रविन्दु रहेको ठमेललाई नेपाल सरकारले उच्च सुरक्षा सर्तकतामा राखेको छ । कोरोना संक्रमणपछि अति शून्य अवस्थामा रहेको ठमेलमा सरकारले कोरोना संक्रमणकै क्रममा मनोरन्जनका लागि नाइट क्लब र रात्रीकालिन व्यवसायहरु खुला गर्न अनुमति दिएसँगै निर्वाध खुलेका छन् । त्यसक्रममा ठमेलस्थित सिनेट क्लब पनि खुलेको छ । त्यही क्लबका मालिकलाई प्रहरीले गुण्डागर्दीको आरोपमा पक्राउ गरेर पनि मुद्धा नचलाई छाडेको पाइएको छ ।

गत शनिबार राति सिनेट क्लबका सञ्चालक छेतेन लामाले ग्राहकलाई कुटपिट गरी एटीएम कार्ड लिएर बैकबाट पैसा समेत निकाल्न लगाएको ग्राहक इभान कार्की बताउँछन् । कार्कीले भने गत शनिबार राती क्लबका सञ्चालक लामाले आफुलाई माथि कुटपिटसहित ५ लाख तिर्नुपर्ने कागज बनाउन लगाएको बताए ।

क्लबका सञ्चालक लामाले कार्कीलाई क्लबमा बसिरहेका बेला बाउन्सर लगाएर कुटपिट गरेको, मोवाइल लुटपाट गरेको तथा उनीसँग भएको एटीएम कार्डको पीन नम्बर मागेर बैकमा भएको पैसा समेत निकालेका कार्कीले बताए । अन्तर्राष्ट्रिय प्रतियोगीतामा सट्टेवाज खेलाउदै आएको र त्यसकै आडमा ठमेलमा सेनेट क्लब खोलेका लामा र कार्कीबीच सट्टेबाजको हिसाब समेत बाँकी रहेको स्रोतले जनाएको छ ।

पीडित कार्कीले आइतबार विहान आफूमाथि कुटपिट भएको भन्दै प्रहरी परिसरमा मौखिक उजुरी समेत गरे । उनको उजुरी पश्चात महानगरीय प्रहरी परिसर काठमाडौले लामालाई पक्राउ गरेको हो । तर, पक्राउ गरेको भोलीपल्ट क्लब संचालकलाई प्रहरीले छोडिदिएको कार्की बताउँछन् ।

क्लब संचालक लामाले कार्कीलाई एउटा बिलमा १ लाख ५० हजारको सही गराएको र अर्को एउटा कागजमा ५ लाख तिर्नु भएको कागज गराएर छाडेका तथा एटीएम कार्डबाट पैसा निलकालेको विषयमा परिसर प्रहरी जानकार थियो । साथै संचालक लामाले कार्कीलाई आफूले पैसा तिर्नु रहेको भन्दै भिडियो रेकर्ड समेत गराए । सो विषयमा पनि प्रहरी जानकार थियो । प्रहरीले लामाको गल्ती देखेपछि पक्राउ गरेर थुनेपनि किन मुद्धा चलाएन भन्ने गम्भीर प्रश्न उठेको छ ।

परिसरका प्रमुख एसएसपी अशोक सिंह आफूलाई गुण्डागर्दी विरुद्ध लाग्ने प्रहरीका रुपमा चिनाउने गर्छन तर लामालाई एकै रातमा छाड्नु पर्ने बाध्यता उनलाई किन आयो । उनी सट्टेबाजको खेलाडी हुन भन्ने बारेमा पनि एसएसपी सिंह जानकार रहेपनि प्रहरीले उनलाई छाड्नु नै रहस्यमयी बनेको छ ।

प्रहरी स्रोतका अनुसार कार्कीले दुई  महिना अघि लामालाई सट्टेबाजको ८० हजार आइसी तिर्न बाँकी थियो । सट्टेवाज नेपालमा प्रतिबन्धित रहेको छ । यद्यपि प्रहरीले दुवै सट्टेवाज हुन भन्ने थाह पाउदा पाउदै आँखा चिम्लिएको छ । गत शनिवार राती साथीहरुसहित क्लबमा पुगेका कार्की केही महिना अघि मात्रै दुबइबाट काठमाडौ आएका थिए ।

लामाले कार्कीमाथि कुटपिट र लुटपाट गरेपछि राती १२ बजे सडकमा छाडेका थिए । प्रहरीलाई भनिस भने ज्यान छैन भन्ने ठान्नु भनेर थर्काएर छाडेका हुन् । लामाको सो क्लबलाई अग्रेजी नयाँ वर्षको दिन महानगरीय प्रहरी वृत्त लैनचौरको टोलीले सुरक्षा दिएको थियो ।

स्वास्थ्य सुरक्षा मापदण्ड विपरित नै खुला गरेको सो क्लबमा प्रहरीकै सुरक्षामा खोलिनुले र कार्कीमाथिको कुटपिटले प्रहरीसँग लामाको साँठगाँठ भएको हुनसक्ने गरिएको छ । काठमाडौमा गुण्डागर्दी निकै कम भएको अवस्था ठमेलका नाइटक्लब सञ्चालकहरुले ग्राहकहरुलाई धम्क्याउनु तथा लुटपाट गर्नुले प्रहरीमाथि समेत प्रश्न उठ्न थालेको छ ।

प्रहरीले क्रिसमस र अंग्रेजी महिनाको न्यू एयर इभ मनाउने क्रममा सेनेट र लाउञ्चबारमा सुरक्षाकर्मी खटाएर राखेको थियो । लाउन्जले भित्र प्रवेश गर्न टिकट काट्नुपर्ने व्यवस्था गरेको र ग्राहकको टिकट चेक गर्ने जिम्मेवारी प्रहरीको थियो । जसले गर्दा प्रहरी र क्लब व्यवसायीहरुबीचको सम्बन्धकै कारण लामाले सिनेट क्लबका लामाले ग्राहकमाथि कुटपिट गर्ने र लुटपाट गर्ने आँट गरेको हुनसक्ने परिसरका एक प्रहरीले भने ।

लामालाई लैनचौर वृत्तका डीएसपी दीपक खड्काले संरक्षण गरेको पनि ठमेलका एक व्यापारी बताउँछन् । ‘हप्ता दुई पटक डीएसपीका सहयोगी प्रहरीहरु क्लबका आउने गरेका छन्’, ती व्यापरीले भने कुनै न कुनै रुपमा खड्काका सहयोगीहरु आएको हामीले देखेका छौ’, ती व्यापारीले भने ।