प्रचण्ड–माधव समूह राजधानी केन्द्रित आन्दोलनमा, माघ ९ मा २ लाख कार्यकर्ता सडकमा उतार्ने

४ माघ, काठमाडाैं ।  नेकपा प्रचण्ड–माधव समूहले प्रधानमन्त्री केपी ओलीविरुद्ध राजधानी केन्द्रित आन्दोलनलाई सशक्त बनाउने भएको छ । यसक्रममा यही माघ ९ गते राजधानीमा दुई लाख मानिस उतार्ने योजनासहित आन्दोलनका कार्यक्रम तय गरिएको छ । आज काठमाडौंमा आयोजित राष्ट्रिय युवा संघ केन्द्रीय कमिटीको दोस्रो पूर्ण बैठकलाई संवोधन गर्दै अध्यक्ष प्रचण्डले यस्तो जानकारी दिएका हुन् ।

देशमा विकसित पछिल्लो गतिविधि र घटनाक्रमलाई हेरेर हामीले आन्दोलनलाई सशक्त र प्रभावकारी बनाउन सकेसम्म ढिला नगर्ने नीति तय गरेकाले माघ १६ गतेका लागि तय कार्यक्रम ९ गते नै गर्ने निर्णय भएको जानकारी अध्यक्ष प्रचण्डले दिएका छन् ।  प्रधानमन्त्री ओलीले असंवैधानिक रुपमा गरेको प्रतिनिधिसभा विघटनलाई जवर्जस्ती बैधता दिन बलजफ्ती गर्न थालेकाले आन्दोलन तत्काल र प्रभावकारी बनाइनुपर्ने अवस्था निर्माण भएको छ– अध्यक्ष प्रचण्डले भने ।

नेपालको कम्युनिष्ट आन्दोलनलाई भड्खालोमा हाल्ने ओलीलाई हामी साधारण सदस्यबाट समेत हटाउन वाध्य हुने अवस्थामा पुगेका छौं भन्दै उनले देशलाई लोकतान्त्रिक पद्धति र प्रणालीमा लैजान संसद पुनस्थापनाको विकल्प नहरेको बताएका छन् । ओली प्रवृत्ति परास्त गर्न राजधानीका युवा सडकमा आउनैपर्ने वाध्यता आइपरेकाले आन्दोलनले आँधीबेहरी ल्याउने पनि उनले बताए ।