सर्वाेच्च अदालतकाे धम्कीपूर्ण भाषाप्रति पत्रकार महासंघको आपत्ति

४ माघ, काठमाडौं । प्रधानमन्त्री केपी ओलीले सर्वाेच्च अदालतका न्यायधीशहरुसँग भेटेको समाचार प्रकाशन गर्ने सञ्चारमाध्यमप्रति सर्वाेच्च अदालतले धम्कीपूर्ण भाषा प्रयोग गरेको भन्दै नेपाल पत्रकार महासंघले आपत्ति जनाएको छ ।

महासंघको सिन्धुपाल्चोकको हेलम्बुमा हिजो बसेको केन्द्रीय समिति बैठकले सर्वाेच्च अदालत जस्तो सम्मानित संस्थाले सञ्चारमाध्यमको नामै किटेर धम्कीपूर्ण भाषाको प्रयोग गरी विज्ञप्ति निकाल्नु आपत्तिजनका रहेको पनि ठहर गरेको छ

महासंघका महासचिव रमेश विष्टले भने – सर्वाेच्च अदालतले जारी गरेको विज्ञप्तिले प्रेस स्वतन्त्रता माथि नै हस्तक्षेप गरेको छ । सर्वाेच्चको विज्ञप्तिमा नेपालखबर र रातोपाटी डटकमको नामै उल्लेख गरी उनीहरुमाथि कारबाही गर्नेसमेत उल्लेख गरिएको छ । यो त प्रेस स्वन्त्रताविरुद्धको ठाडो हस्तक्षेप र मानमर्दन हो – विष्टले भने ।

गएको वुधबार प्रतिनिधिसभा विघटनविरुद्ध सर्वाेच्च अदालतमा जारी सुनुवाईका क्रममा एकजना निवेदक समेत रहेकी निवर्तमान सांसद शशी श्रेष्ठले यस्तो समाचार प्रकाशित भएको भन्दै बेञ्चको ध्यानाकर्षण गराएकी थिइन् । यसबारे गएको शुक्रबार सर्वाेच्च अदालतले प्रेस विज्ञप्ति जारी गर्दै स्वतन्त्र प्रेस स्वतन्त्रतामाथि अंकुश लगाउन खोजेको थियो ।