इन्फ्रास्ट्रक्चर बैंकको आईपीओमा लगानीकर्ताको आकर्षणः माग भन्दा बढी बिक्यो, कतिले दिए आवेदन ?

४ माघ, काठमाडौं । नेपाल इन्फ्रास्ट्रक्चर बैंक लिमिटेडले माघ २ गते, शुक्रबारदेखि निष्कासन तथा बिक्री खुल्ला गरेको आईपीओमा पनि लगानीकर्ताको आकर्षण रहेको देखिएकाे छ ।

आइतबारसम्म बैंकको आईपीओमा माग भन्दा बढी आवेदन परेको छ । सीडीएस एक्ड क्लियरिङ लिमिटेडको तथ्यांक अनुसार आइतबारसम्म ९ करोड ९४ लाख ६ हजार ७४० कित्ताका लागि आवेदन परेको छ । कुल ८ लाख २ हजार ७०८ जना लगानीकर्ताले ९ अर्ब ९४ करोड ६ लाख ७४ हजार रुपैयाँ बराबरको आवेदन दिएका हुन् ।

कम्पनीले शुक्रबार (माघ २ गते) देखि सर्वसाधारणका लागि ७ करोड ५८ लाख ४० हजार कित्ता आईपीओ खुला गरेको हो । यस आधारमा, सर्वसाधारणले मागभन्दा १.३१ गुणा बढी आवेदन दिएका हुन् ।

कम्पनीले कुल ८ करोड कित्ता शेयरमध्ये ०.२०५ अर्थात १ लाख ६० हजार कित्ता शेयर कर्मचारीहरुका लागि र ५५ ले हुने ४० लाख कित्ता शेयर सामूहिक लगानी कोषलाई छुट्याएर बाँकी शेयर सर्वसाधारणमा जारी गरेको हो ।

यस आईपीओमा लगानीकर्ताले माघ ६ गतेसम्म आवेदन दिन सक्नेछन् । यसआधारमा आईपीओ भर्ने म्याद अझै दुई कार्यदिन बाँकी रहेको छ ।