जुवाकाे खालमा प्रहरीकाे छापा, एक लाख रकम एसपीकै खोजीमा !

४ माघ, गोरखा । तपाई हामी सबैलाई थाहा छ प्रहरीको काम सुरक्षा दिने हो । प्रहरीले नागरिकको सुरक्षामा दिन रात नभनि खटिएको पनि हामीले देखेका छाैँ । तर कहिले काही तिनै सुरक्षा दिने प्रहरीबाट बदनाम नै खुल्ने खालका कामहरु पनि हुने गर्छ ।

यस्तै काम गोरखामा भएको छ ।  दशैँ‌ तिहारको समयमा जुवाको खालबाट बरामद गरिएको एक लाख रुपैयाँ बढी रकम एसपीकै खोजीमा परेको खबर बाहिरिएकाे छ । दशैँ‌ तिहारको समयमा इलाका प्रहरी कार्यालय जौवारीले करिव ६९ हजार रुपैयाँ जुवाको खालबाट बरामद गरेको थियो ।

उक्त रकम इन्चार्ज प्रहरी निरीक्षक ईश्वर लौडारीले तिहारलगत्तै जिल्ला प्रहरी कार्यालय पठाएका थिए । अहिले अनुसन्धान हुँदै गएपछि त्यो रकम जिल्ला प्रहरी प्रमुख एसपी सुरेन्द्र गुरुङले आफैंले राखेको खुलेको छ ।

त्यस्तै अनुसन्धान  इलाका प्रहरी कार्यालय ठाटीपोखरीले बरामद गरेको करिब ५० हजार रुपैयाँ इन्चार्ज प्रहरी निरीक्षक सोमदास ढकालले पनि जिल्ला प्रहरी कार्यालय पठाए । तर दुवै ठाउँबाट बरामद भएको उक्त रकम हालसम्म राजश्वमा दाखिला भएको छैन ।

गण्डकी प्रदेश प्रहरी प्रमुख डीआईजी घनश्याम अर्यालका अनुसार जुवाको खालबाट बरामद रकम जतिसक्दो चाडो राजश्वमा दाखिला गर्नुपर्छ । ‘जुवाको खालमा बरामद गरिएको रकम तुरुन्त राजश्वमा दाखिला गर्नुपर्छ, जुवाडेलाई मुद्धा चलाउनुपर्छ, होइन भने प्रहरी अधिकारीको बदनियत देखिएको छ ।

दशैँ तिहारको समयमा थुप्रै जुवाका खालमा प्रहरीले छापा मारेपनि असोज १ गतेदेखि मंसिर मसान्तसम्म जुवाका तीन वटा मात्र मुद्धा दर्ता भएको जिल्ला प्रशासन कार्यालयले जनाएको छ ।

तर दसैं तिहारको समयमा इप्रका ठाँटीपोखरी र जौवारी मातहतको विभिन्न क्षेत्रबाट पक्राउ परेका जुवाडेहरु विरुद्ध मुद्धा दर्ता पनि नभएको र जुवाको खालबाट बरामद गरिएको रकम पनि हालसम्म राजश्वमा दाखिला भएको छैनन । जिल्ला प्रहरी प्रमुख एसपी गुरुङले पनि हालसम्म त्यो रकम राजश्वमा दाखिला नगरेको स्वीकार गरेका छन् ।

स्मरणरहोस उपत्यकामा मात्रै गत दशैँमा ७ हजार ५ सय ५० जना प्रहरी परिचालन गरिएको थियो । यस्तै सादा पोसाक, मोबाइल गस्ती, मोटरसाइकल गस्तीसमेत गरिएको थियो । उपत्यकामा ५४ स्थानमा ट्राफिकसहितको संयुक्त चेकिङ पनि राखिएको थियो । यस्तै २९ स्थानमा यात्रु सहायता कक्ष सञ्चालन गरिएको थियो

यस्तै दशैँ सुरक्षाका लागी प्रदेश १ मा ७ हजार ९ सय २२ जना प्रहरी खटाइएको थियो । प्रदेश २ मा ७ हजार ३ सय १० जना, बाग्मती प्रदेशका काठमाडौं, भक्तपुर र ललितपुर जिल्लामा बाहेक ४ हजार १ सय ५३ जना प्रहरी खटाइएको छ ।