नेकपा: दुवै खेमाको तानातानमा कांग्रेस

७ माघ, काठमाडौं । प्रमुख प्रतिपक्षी दल नेपाली कांग्रेसको अनिर्णय र अन्योलले नेकपा भित्रको अन्तरद्धन्द्धले पनि कुनै निकास नपाउने अवस्था देखिएको छ ।  प्रदेश नं. १ र बाग्मती प्रदेशमा मुख्यमन्त्रीहरु विरुद्ध दर्ता भएको अविश्वास प्रस्ताव के होला भन्ने अन्योल यथावत छ ।

केन्द्रमा विभाजित भएको देखिएपनि कानूनी रुपमा भने नेकपा अझै सग्लै छ भन्ने कांग्रेसको ठम्याइ रहेकाले निरपेक्ष रुपमा आफूलाई राख्न खोजेको देखिन्छ । यद्यपि विभाजित भनिएका नेकपाका दुबै समूहले कांग्रेसको साथ र समर्थन खोजेका छन् । दुबै समूहले एउटा प्रदेशको मुख्यमन्त्रीसहित सत्ता साझेदारी गर्न अनौपचारिक रुपमा प्रस्ताव नै गरेका छन् । तर केन्द्रले कुनै ठोस नीति नबनाएकाले प्रदेशसभाका नेताहरु अन्योलमा देखिएका छन् ।

खासगरी कांग्रेसभित्रको दुई धारले यो प्रकरणलाई समेत गाँजेको देखिन्छ । पार्टी सभापति शेरबहादुर देउवा सकेसम्म प्रधानमन्त्री केपी ओलीसँग नै सत्ता साझेदारी गर्न उत्सुक देखिएका छन् , जबकी असन्तुष्ट पक्षका नेता रामचन्द्र पौडेललगायत कृष्णप्रसाद सिटौला भने अहिलको अवस्थामा ओलीसँग सत्ता यात्रा गर्दा नराम्रो सन्देश जाने भन्दै बरु प्रचण्ड–माधव समूहसँग नै सहकार्य गर्नु प्राकृतिक हुने धारणा राख्छन् ।

यही सन्दर्भमा कुरा गर्न अस्ती दिउँसो सभापति देउवा वरिष्ठ नेता पौडेल निवास बोहराटार गएका थिए । करिब डेढ घण्टा लामो छलफलका क्रममा देउवाले यो विषयमा सम्बन्धित प्रदेशसभालाई नै सर्वाधिकार दिंदा सही हुने धारणा राखेका थिए । तर वरिष्ठ नेता पौडेल भने प्रदेशसभा संसदीय दललाई त्यस्तो अधिकार दिंदा भाँडभैलो हुन सक्ने भन्दै केन्द्रले नै नीति बनाएर निर्णय गर्नुपर्ने राय दिएका थिए ।

स्रोत भन्छ–सभापति देउवा ओलीसँग गठबन्धन बनाएर प्रदेश नं. १ मा शेरधनलाई कायमै राख्ने र बाग्मती प्रदेशमा ओलीको समर्थनमा इन्द्र बानियाँलाई मुख्यमन्त्री बनाउने पक्षमा छन् । तर पौडेल पक्ष भने त्यो काम गैर राजनीतिक हुने भन्दै बरु गठबन्धन बनाउने नै भए प्रचण्ड–माधव पक्षसँग गरौं भन्नेमा उभिएका छन् ।

आजबाट प्रदेश नं. १ को अधिवेशन सुरु भएको छ । यो अधिवेशनको प्राथमिक काम भनेकै अविश्वास प्रस्तावबारे टुंगो लगाउने हो । अहिलेको अंक गणित हेर्दा प्रचण्ड – माधव पक्षकै बढी संख्या भएपनि एक्लै सरकार बदल्ने हैसियत राखेको देखिंदैन । त्यसैले सरकार हटाउन र नयाँ सरकार बनाउन समेत कांग्रेसको सहयोग आवश्यक देखिएको छ । त्यसका लागि दुबै पक्षले कांग्रेससँग प्रस्ताव गरेका छन् ।

स्रोत भन्छ–सभापति देउवा ओलीसँग गठबन्धन बनाएर प्रदेश नं. १ मा शेरधनलाई कायमै राख्ने र बाग्मती प्रदेशमा ओलीको समर्थनमा इन्द्र बानियाँलाई मुख्यमन्त्री बनाउने पक्षमा छन् । तर पौडेल पक्ष भने त्यो काम गैर राजनीतिक हुने भन्दै बरु गठबन्धन बनाउने नै भए प्रचण्ड–माधव पक्षसँग गरौं भन्नेमा उभिएका छन् । यस्तो गठबन्धन बन्दा प्रदेश नं. १ मा कांग्रेस संसदीय दलका नेता राजीव कोइरालालाई मुख्यमन्त्री बनाउन सकिने र बाग्मती प्रदेशमा अष्टलक्ष्मी शाक्यलाई सहयोग गर्नुपर्ने हुन्छ ।

यही विषयमा सहमति नजुट्दा नेकपा सरकार तत्कालै विस्थापित हुने अवस्था देखिएको छैन ।  नेकपा औपचारिक रुपमा विभाजित भैसकेको छैन , त्यसैले पनि कांग्रेसलाई ठोस निर्णय गर्न अफ्ठेरो परेको बुझ्न सकिन्छ । आजै पनि प्रचण्डले प्रतिनिधिसभा पुनस्थापना हुने ठोकुवा गर्दै त्यसपछि देउवाको नेतृत्वमा नयाँ सरकार बनाउन आफ्नो सहयोग रहने वचन दिएका छन् ।

राजधानीमा विभिन्न सञ्चारमाध्यमका सम्पादकहरुसँगको अन्तक्रिया कार्यक्रममा प्रचण्डले ओलीतन्त्रबाट देशलाई मुक्त गर्न कांग्रेससँग मिलेर संविधान र लोकतन्त्रको रक्षा गर्न आफ्नो पार्टी तयार रहेको बताएका छन् । यसरी नेकपाका दुबै खेमाको तानातानमा परेको नेपाली कांग्रेसले आफ्नो पोजिसन क्लियर गर्न नसक्दा राजनीतिक अस्थिरता र अन्योल अझै थपिने आशंका गर्न सकिन्छ ।