चन्द्रागिरिको आईपीओ ‘प्रि अलटमेण्ट’ आज, बाँडफाँड बारे यस्तो भन्छ बिक्री प्रबन्धक ?

७ माघ, काठमाडौं । चन्द्रागिरि हिल्स कम्पनीले दोस्रो चरणमा सर्वसाधारणमा जारी गरेको शेयरको ‘प्रि अलटमेण्ट’ बुधबार (आज) हुने भएको छ । कम्पनीको शेयर निष्काशन तथा बिक्री प्रबन्धक ग्लोबल आईएमई क्यापिटलले बुधबार आईपीओको ‘प्रि अलटमेण्ट’को तयारी भइरहेको जनाएको छ ।

क्यापिटलका अनुसार ‘प्रि अलटमेण्ट’ गरी बाँडफाँडका लागि बोर्डसँग स्वीकृति माग गर्ने तयारी भइरहेको छ । ग्लोबल आईएमई क्यापिटलका अनुसार बुधबार वा बिहीबार मध्ये एक दिनमा शेयर बाँडफाँड गर्ने गरी धितोपत्र बोर्डको स्वीकृति माग गरिएको छ ।

प्रि अलटमेण्ट, को विवरण बोर्डमा बुझाएसँगै बोर्डले निर्धारण गरेका दिन कम्पनीको शेयर बाँडफाँड गरिनेछ । कम्पनीले दोस्रो चरणमा सर्वसाभारणको लागि निष्कासन गरेको शेयरमा १२ लाख ५२ हजारभन्दा बढी संख्यामा आवेदन परेको हो ।

उक्त परेको आवेदनलाई प्रमाणीकरण गर्ने काम अन्तिम चरणमा पुगेको पनि क्यापिटलले जनाएको छ । केही बेरमा अन्तिम तथ्यांक तयार पारेर प्रि अलटमेण्ट गरिनेक्यापिटलले जनाएको छ ।

कम्पनीले प्रतिकित्ता १०० अंकित मूल्यका दरले कुल १५ लाख ३४ हजार ९१ कित्ता शेयर सर्वसाधारणमा बिक्री गरेको हो । जसमा ४ प्रतिशत अर्थात ६१ हजार ३६४ कित्ता शेयर कम्पनीका कर्मचारीहरुलाई र ५ प्रतिशत अर्थात ७६ हजार ७०५ कित्ता शेयर सामूहिक लगानी कोषको लागि छुट्याएर बाँकी १३ लाख ९६ हजार २२ कित्ता शेयर सर्वसाधारणमा निष्काशन गरेको थियो ।