शेयरबजार अझै बढ्ने संकेत, कारोबार रकम ९ अर्ब माथि

११ माघ, काठमाडौं । आज नेपाल स्टक एक्सचेन्ज (नेप्से) ५० दशमलव २० अंगले वृद्धि हुँदै दुई हजार चार सय २४ दशमलव ८४ बिन्दूमा पुगेको छ । विगतका महिनादेखि नै निरन्तर उकारो लाग्दै आएको बजारमा आज भने उत्साहजनक कारोबार भएको छ । आजकाे वृद्धिले बजार अझै बढ्ने संकेत गरेकाे छ ।

बजारमा कुल ९ अर्व ३७ करोड ६० लाख मुल्य बराबरको १ करोड ९३ ७९ हजार कित्ता शेयर किनबेच भएको छ । आज तीन वटै सुचकहरुमा सकारात्मक वृद्धि देखिएता पनि १२ उपसुचक मध्ये ११ उपसुचक बढेको छ । व्यापार उपसमुह २.४७ प्रतिशतले ओह्रालो लागेको छ ।

नेपाल लाइफको मात्रै ६६ करोड रुपैयाँको कारोबार हुँदा पुनर्बीमा कम्पनीको ३४ करोड, नेपाल टेलिकमको ३१ करोड, नेशनल लाइफको २४ करोड, प्राइम कमर्सियल बैंकको २२ करोड रुपैयाँको किनबेच भएको छ ।

सिभिल बैंकको १३ लाख कित्ता शेयरको माग हुँदा मेगा बैंकको साढे ९ लाख कित्ता, प्रभु लाइफ र नेपाल क्रेडिट एण्ड कमर्स बैंकको ८/८ लाख कित्ता सेयर माग भएको थियो । सर्वाधिक किनबेच भने एचआइडिसिएल, कुमारी बैंक, प्रभु बैंक, सिभिल बैंक अरुण काबेली पावर र प्राइम कमर्सियल बैंकको करिब ५/५ लाख कित्ता सेयर किनबेच भएको छ ।

आज १५ कम्पनीको सकारात्मक सर्किट लागेको थियो भने ७ वटा कम्पनीको मूल्य स्थिर रहँदा ४६ वटा कम्पनीको मूल्य घटेको छ । सबैभन्दा धेरै निर्जीवन बीमा समुह २२१ अंकले बढ्दा जीवन बीमा समुह १६५ अंक, लघुवित्त समुह १०२ र अन्य समुह १०४ अंकले बढेका छन् । व्यापार समुहको सूचक ७३ अंकले घटेको छ ।