एक सातामा वाणिज्य बैंकको निक्षेप १० अर्बले घट्यो

१३ माघ, काठमाडौं । पछिल्लो एक सातामा वाणिज्य बैंकहरुको निक्षेप संकलन १० अर्ब रुपैयाँले घटेको छ । गत माघ २ गतेसम्म वाणिज्य बैंकहरुको निक्षेप संकलन ३७ खर्ब ७९ अर्ब रुपैयाँ निक्षेप संकलन गरेका थिए ।

माघको दोस्रो साता आइपुग्दा वाणिज्य बैंकको निक्षेप संकलन ३७ खर्ब ६९ अर्ब रुपैयाँमा सीमित भएको छ । जुन अधिल्लो साताको तुलनामा घटेको हो ।

नेपाल बैंकर्स संघद्वारा उपलब्ध तथ्यांकअनुसार माघ २ गतेदेखि ९ गतेसम्म अर्थात् एक सातामा १८ वटा वाणिज्य बैंकले निक्षेप घटाएका छन् । जसमा सबैभन्दा बढी प्रभु बैंकले १ अर्ब ९६ करोड रुपैयाँ, सिभिल बैंकले १९ करोड रुपैयाँले घटाएका हुन् । सो अवधिमा ९ वटा वाणिज्य बैंकले भने निक्षेप संकलन ९ करोड रुपैयाँदेखि १ अर्ब ८१ करोड रुपैयाँले बढाएका छन् ।

सातामा निक्षेप घटाउने बैंकहरु

बैंकर्स संघद्वारा उपलब्ध तथ्यांक अनुसार १८ वटा वाणिज्य बैंकले निक्षेप घटाएका छन् । जसमा ८ वटा बैंकले १ अर्ब रुपैयाँदेखि १ अर्ब ९६ करोड रुपैयाँसम्म र १० वटा बैंकले १९ करोड रुपैयाँदेखि ९८ करोड रुपैयाँसम्म निक्षेप घटाएका हुन् ।

सो अवधिमा सबैभन्दा बढी प्रभु बैंक र नेपाल एसबीआइ बैंकले १ अर्ब ९६ करोड रुपैयाँले निक्षेप घटाएका छन् । साथै, कुमारी बैंकले १ अर्ब ८५ करोड रुपैयाँ र हिमालय बैंकले १ अर्ब ५२ करोड रुपैयाँले निक्षेप घटाएका छन् ।

माघको २ गतेको निक्षेपमा माघ ९ गतेसम्म एनसीसी बैंकले १ अर्ब ४२ करोड रुपैयाँले, स्ट्याण्डर्ट चार्डर्ड बैंकले १ अर्ब २७ करोड रुपौयाँले, नेपाल बैंकले १ अर्ब १२ करोड रुपैयाँ र एभरेष्ट बैंकले १ अर्ब ४ करोड रुपैयाँले निक्षेप संकलन घटाएका छन् ।

यसैगरी, सो अवधिमा नेपाल इन्भेष्टमेन्ट बैंकले ९८ करोड रुपैयाँले, माछापुच्छे बैंकले ७२ करोड रुपैयाँले, सनराइज बैंकले ५९ करोड रुपैयाँ र सेञ्चुरी बैंकले ५४ करोड रुपैयाँले निक्षेप घटाएका छन् ।

साथै, लक्ष्मी बैंकले ४९ करोड रुपैयाँले, एनएमबी बैंकले ४७ करोड रुपैयाँले, नबिल बैंकले ३४ करोड रुपैयाँले सिटिजन्स बैंकले २९ करोड रुपैयाँले, नेपाल बंगलादेश बैंकले २६ करोड रुपैयाँले र सिभिल बैंकले १९ करोड रुपैयाँले माघको पहिलो सातामा निक्षेप घटाएको छ ।